ឥណ្ឌា៖ ប្រព័ន្ធផ្សព្វផ្សាយក្នុងស្រុកបានរាយការណ៍ថា កាលពីថ្ងៃអង្គាររដ្ឋាភិបាលសហព័ន្ធរបស់ប្រទេសឥណ្ឌា បានស្នើសុំឱ្យផ្ដល់ទិន្នន័យចំនួនមនុស្សស្លាប់ ដែលអាចបណ្តាលមកពីកង្វះអុកស៊ីសែនអំឡុងរលកទី២ នៃវីរុស COVID-19។
ទិន្នន័យនេះនឹងត្រូវចងក្រងបញ្ចូលគ្នា និងដាក់ជូនសភានៅមុនដំណាច់សម័យប្រជុំរដូវមូសុងនៅថ្ងៃទី១៣ ខែសីហា។ សារព័ត៌មានមួយបានដកស្រង់ប្រភពព័ត៌មានមួយចំនួនថា យើងបានទទួលសំណួរម្តងហើយម្តងទៀត អំពីការស្លាប់ដោយសារកង្វះអុកស៊ីសែននៅក្នុងសភា។ កាលពីសប្ដាហ៍មុនឆ្លើយតបទៅនឹងសំណួរស្តីពីកង្វះអុកស៊ីសែនធ្ងន់ធ្ងរ អំឡុងរលកទី២ នៃការរាតត្បាតសកល ក្រសួងសុខាភិបាលសហព័ន្ធបាននិយាយថា គ្មានការស្លាប់ដោយសារកង្វះអុកស៊ីសែនត្រូវបានរាយការណ៍ជាក់លាក់ ដោយបណ្ដារដ្ឋណាទេ។ ការឆ្លើយតបរបស់រដ្ឋាភិបាលកើតឡើងបន្ទាប់ពីរលកទី២ នៃជំងឺ COVID-19 ដ៏មហន្តរាយដែលបានបំផ្លិចបំផ្លាញហេដ្ឋារចនាសម្ព័ន្ធសុខភាពរបស់ប្រទេស ហើយបណ្ដាលឲ្យមនុស្សរាប់ពាន់នាក់បានស្លាប់ជារៀងរាល់ថ្ងៃ។
ករណីឆ្លងជំងឺ COVID-19 បានកើនឡើងយ៉ាងគ្រោះថ្នាក់ចាប់ពីខែមេសាដល់ខែមិថុនា ហើយបានឈានដល់កម្រិតខ្ពស់បំផុតកាលពីខែឧសភា ដោយមានអ្នកឆ្លងជាង ៤លានករណី និងមានមនុស្សស្លាប់ជាង ៤.០០០នាក់។ គិតត្រឹមព្រឹកថ្ងៃពុធនេះ ប្រទេសឥណ្ឌាមានមនុស្សឆ្លងវីរុស COVID-19 ចំនួន ៣១,៤៨៣,៤១១នាក់បន្ទាប់ពីមានករណីឆ្លងថ្មីចំនួន ៤២,៩២៨នាក់ និងស្លាប់ចំនួន ៤២២,០៥៤នាក់បន្ទាប់ពីមានអ្នកស្លាប់ថ្មីចំនួន ៦៤០នាក់បន្ថែមទៀត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
