មណ្ឌគិរី ៖ ក្នុងឆ្នាំ២០២៤នេះ ហ្វូងដំរីព្រៃបានបង្ហាញវត្តមាននៅតាមតំបន់ការពារធម្មជាតិក្នុងប្រទេសកម្ពុជា មានការកើនឡើងជាងបណ្តាឆ្នាំមុនៗ។ នេះបើតាមការឱ្យដឹងពីឯកឧត្តម ខ្វៃ អាទិត្យា អនុរដ្ឋលេខាធិការ និងជាអ្នកនាំពាក្យក្រសួងបរិស្ថាន បានប្រាប់BTVនៅថ្ងៃទី២៤ ខែមេសា ឆ្នាំ២០២៤។

ឯកឧត្តមបានឱ្យដឹងទៀតថា ថ្មីៗនេះ ហ្វូងដំរីព្រៃ ឬដំរីអាស៊ី បានបង្ហាញខ្លួននៅតាមតំបន់ការពារធម្មជាតិក្នុងខេត្តមណ្ឌលគិរី ដែលមានចំនួនច្រើនជាងបណ្តាឆ្នាំកន្លងទៅ ដោយមន្រ្តីឧទ្យានុរក្ស បានសង្កេតឃើញវត្តមានដំរីព្រៃធ្វើដំណើរក្នុងតំបន់ព្រៃ ហើយពេលខ្លះបានចូលមកក្នុងសហគមន៍តំបន់ការពារធម្មជាតិ ជាហ្វូងៗចន្លោះពី២០ទៅ៣០ក្បាល ដែលចំនួននេះ មានការកើនឡើងពីចំនួន៣ទៅ៥ ក្បាល។

ឯកឧត្តមបន្តថា វត្តមានដំរីនេះ ជាសញ្ញាបញ្ជាក់ថា ពួកវារស់នៅសុខសាន្ត និងបង្កើតកូនចៅជាបន្តបន្ទាប់ ដោយសារការគ្រប់គ្រងធនធានធម្មជាតិ ការអភិរក្សជីវៈចម្រុះបានល្អ ជាពិសេសនៅខេត្តមណ្ឌលគីរី ដែលមានប្រព័ន្ធការពារធម្មជាតិ ដូចជាដែនជម្រកសត្វព្រៃស្រែពក ដែនជម្រកសត្វព្រៃលំផាត់ ដែនជម្រកសត្វព្រៃភ្នំព្រេច និងដែនជម្រកសត្វព្រៃកែវសីមាជាដើម។

ដើម្បីធានាការស់នៅរបស់សត្វដំរីអាស៊ី ទទួលបានការការពារហ្មត់ចត់ និងអាចមានឱកាសបង្កើនចំនួនរបស់វាឱ្យមានការកើនឡើងក្នុងប្រទេសកម្ពុជា ឯកឧត្តម ខ្វៃ អាទិត្យា បានអំពាវនាវដល់ប្រជាពលរដ្ឋ និងភាគីពាក់ព័ន្ធ ចូលរួមទប់ស្កាត់ការបរបាញ់សត្វព្រៃ ការដាក់អន្ទាក់ និងការកាប់រុករានដីព្រៃក្នុងតំបន់ការពារធម្មជាតិ និងបង្កើនការចូលរួមការពារ និងអភិរក្សធនធានធម្មជាតិ ដោយចូលរួមដាំដើមឈើឱ្យបានច្រើននៅតាមមូលដ្ឋាន និងដាំស្តារព្រៃរេចរឹល បង្កើនភាពបៃតង និងឈានទៅសម្រេចគម្របព្រៃ កើនឡើងឱ្យបាន ៦០% នៃផ្ទៃប្រទេសត្រឹមឆ្នាំ២០៥០៕

គួរបញ្ជាក់ដែរថា ដំរីព្រៃ ឬដំរីអាស៊ី កំពុងរងការគំរាមកំហែងលើដែនជម្រករបស់វាធ្ងន់ធ្ងរ នៅទូទាំងសាកលលោក។ ដំរីព្រៃត្រូវបានចាត់បញ្ចូលជាប្រភេទសត្វជិតផុតពូជនៅក្នុងបញ្ជីក្រហមរបស់អង្គការសហភាពអន្ដរជាតិដើម្បីការអភិរក្សធម្មជាតិ ហៅកាត់ជាភាសារអង់គ្លេស(IUCN)។

 នៅក្នុងប្រទេសកម្ពុជា ដំរីអាស៊ីមានចំនួនប្រមាណពី ៤០០ ទៅ៦០០ក្បាល ដែលភាគច្រើនរស់នៅក្នុងតំបន់ជួរភ្នំក្រវាញ និងតំបន់ខ្ពង់រាបភាគខាងកើតក្នុងខេត្តមណ្ឌលគីរី។ នេះបើតាមរបាយការណ៍របស់ក្រសួងបរិស្ថាន។ អត្ថបទ៖ទូច សោភ័ណ