ផ្ទៃមេឃនៅភាគខាងត្បូងនៃប្រទេសក្រិក បានប្រែទៅជាពណ៌ទឹកក្រូច កាលពីថ្ងៃអង្គារ (ទី២៣ ខែមេសា) ខណៈដែលពពកធូលីដែលបានបក់កាត់សមុទ្រមេឌីទែរ៉ាណេ បានគ្របលើទីតាំងបុរាណ Acropolis និងកន្លែងសំខាន់ៗផ្សេងទៀត ក្នុងរដ្ឋធានីអាថែន។

កម្លាំងខ្យល់បក់ដ៏ខ្លាំងបាននាំយកធូលីពីវាលខ្សាច់សាហារ៉ា ដែលធ្វើឲ្យបរិយាកាសនៃរដ្ឋធានីមានទិដ្ឋភាពដូចជាភពព្រះអង្គារ អំឡុងពេលមានពន្លឺថ្ងៃប៉ុន្មានម៉ោងចុងក្រោយ។ ផ្ទៃមេឃត្រូវបានគេព្យាករថា នឹងស្រឡះនៅថ្ងៃពុធ (ទី២៤ ខែមេសា) នេះ ខណៈកម្លាំងខ្យល់ប្រែប្រួលមិនទៀងទាត់ នឹងបក់នាំធូលីទៅ ហើយសីតុណ្ហភាពធ្លាក់ចុះ។

កាលពីថ្ងៃអង្គារនោះ កម្រិតសីតុណ្ហភាពខ្ពស់ប្រចាំថ្ងៃ នៅផ្នែកខ្លះនៃកោះ Crete ភាគខាងត្បូង បានឡើងខ្ពស់បំផុតដល់ ៣០អង្សាសេ ដោយលើសពីសីតុណ្ហភាព ២០អង្សាសេ ដែលត្រូវបានកត់ត្រានៅទូទាំងភាគខាងជើងប្រទេសក្រិក៕