ក្រសួងការបរទេស និងអភិវឌ្ឍន៍របស់អាល្លឺម៉ង់ នៅថ្ងៃពុធ (២៤ មេសា) បានឲ្យដឹងនៅក្នុងសេចក្តីថ្លែងការណ៍រួមមួយថា រដ្ឋាភិបាលគ្រោងនឹងចាប់ផ្ដើមកិច្ចសហប្រតិបត្តិការឡើងវិញជាមួយទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន (UNRWA) នៅតំបន់ហ្កាហ្សា។
ការសម្រេចនេះធ្វើឡើងបន្ទាប់ពីមានការពិនិត្យឡើងវិញរបស់អតីតរដ្ឋមន្ត្រីការបរទេសបារាំង លោកស្រី Catherine Colonna ចំពោះសមត្ថភាពរបស់ UNRWA ក្នុងការធានាឲ្យបាននូវអព្យាក្រឹតភាព និងឆ្លើយតបទៅនឹងការបំពានណាមួយ បន្ទាប់ពីមានការចោទប្រកាន់របស់អ៊ីស្រាអែល ដែលថា បុគ្គលិករបស់ខ្លួនចំនួន ១២នាក់ បានចូលរួមក្នុងការវាយប្រហាររបស់ក្រុមហាម៉ាស កាលពីថ្ងៃទី៧ ខែតុលា។
ការត្រួតពិនិត្យដែលដឹកនាំដោយលោកស្រី Colonna អំពីអព្យាក្រឹតភាពរបស់ទីភ្នាក់ងារនេះ កាលពីថ្ងៃចន្ទ (ទី២២ ខែមេសា) បានសន្និដ្ឋានថា អ៊ីស្រាអែលមិនទាន់មានភស្តុតាងគាំទ្រដល់ការចោទប្រកាន់របស់ខ្លួនដែលថា បុគ្គលិក UNRWA រាប់រយនាក់ ជាភ្នាក់ងារសម្ងាត់ក្នុងក្រុមភេរវករ នៅតំបន់ហ្កាហ្សា។
ជាមួយគ្នានេះ ក្រសួងអាល្លឺម៉ង់បានជំរុញឲ្យ UNRWA អនុវត្តឲ្យបានឆាប់រហ័សនូវអនុសាសន៍របស់របាយការណ៍ ដែលរួមមានទាំងការពង្រឹងមុខងារសវនកម្មផ្ទៃក្នុងរបស់ខ្លួន និងការកែលម្អការត្រួតពិនិត្យផ្នែកខាងក្រៅនៃការគ្រប់គ្រងគម្រោង។
នៅក្នុងសេចក្តីថ្លែងការណ៍នោះ ក្រសួងបានលើកឡើងថា៖ «ដើម្បីគាំទ្រដល់កំណែទម្រង់ទាំងនេះ រដ្ឋាភិបាលអាល្លឺម៉ង់នឹងចាប់ផ្ដើមបន្តកិច្ចសហប្រតិបត្តិការរបស់ខ្លួនជាមួយ UNRWA នៅតំបន់ហ្កាហ្សា ក្នុងពេលឆាប់ៗនេះ ដូចដែលប្រទេសអូស្ត្រាលី កាណាដា ស៊ុយអែត និងជប៉ុន ក្នុងចំណោមប្រទេសផ្សេងទៀត បានធ្វើរួចហើយ»៕