មន្រ្តីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ឲ្យដឹងថា ផលិតផល​របស់​សហ​គ្រាស Home Taste Food មានដូចជា ត្រីងៀត ត្រីឆ្អើរ និងត្រីបង្ហើម ទម្ងន់ ៤,៧តោន ត្រូវ​បាន​នាំ​ចេញជាលើកដំបូងទៅកាន់ទីផ្សារប្រទេសអូស្រ្តាលី តាមរយៈ​ការ​ប្រើប្រាស់​និមិត្ត​សញ្ញា​គុណ​ភាព​ផល ផលិតផលជលផលកម្ពុជា ហៅកាត់ថា (CQS)។

លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និង​នេសាទ នៅក្នុងបណ្តាញសង្គមហ្វេសប៊ុក នៅរសៀលថ្ងៃទី២៥ ខែមេសានេះ បានមាន​ប្រសាស​ន៍​ថា​ ការនាំចេញលើកដំបូងជាលក្ខណៈផ្លូវការនេះ ធ្វើឡើងដោយដឹកតាមកប៉ាល់។ លោកជំទាវ បាន​ឲ្យ​ដឹង​ទៀតថា តាមគម្រោងផលិតផលត្រីកែច្នៃទាំង ៣ប្រភេទនេះ នឹងទៅដល់ប្រទេស​អូស្ត្រាលី ​នៅថ្ងៃទី២៨ ឬ២៩ ខែមេសា ឆ្នាំ២០២៤ខាងមុខនេះ។

សូមជម្រាបថា Home Taste Food គឺជាសហគ្រាសរបស់ខ្មែរដំបូងគេ ដែលបាន​នាំ​ចេញ​ផលិត​ផល​ត្រី​កែច្នៃ ទៅកាន់ទីផ្សារបរទេសជាផ្លូវការ។ ដើម្បីអាចនាំចេញបាន សហគ្រាស ត្រូវឆ្លងកាត់​ការ​​បណ្ដុះ​បណ្ដាលពីគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ដែល​សហការអនុវត្តដោយរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ ជាមួយ​និង​អង្គការ UNIDO មានគោលដៅគាំទ្រ សមត្ថភាពបច្ចេកទេស ពង្រឹងវិស័យឯកជន លើក​កម្ពស់​ការ​ប្រកួត​ប្រជែង អនុវត្តនូវ​ប្រព័ន្ធ​ស្តង់ដា​ម្ហូប​អាហារ​នៅ​កម្ពុជា​ដើម្បី​ឆ្លើយ​តប​ទៅ​នឹង​តម្រូវ​ការ​ជាតិ និង​អន្តរជាតិ។

ពាក់ព័ន្ធការងារនេះ ក្រសួងកសិកម្ម រុក្ខាប្រមាញ់ និងនេសាទ បានអះអាងថា នឹងបន្តគាំទ្រ​ដល់​សហគ្រាស Home Taste Food ដែលមានបំណង​ពង្រីក​ការ​នាំចេញ​ផលិតផល​របស់​ខ្លួន​ទៅកា​ន់​ទីផ្សារ​សហរដ្ឋអាមេរិក និងប្រទេសញូហ្សែលែន នៅក្នុងបរិមាណជាង ១០០តោន​ទៀត​នា​ពេល​ខាង​មុខ​។

ទន្ទឹមគ្នានេះ រដ្ឋបាលជលផលនៃក្រសួងកសិកម្ម ក៏ដូចជាអង្គការដៃគូពាក់ព័ន្ធ នឹងបន្តធ្វើការ​ជាមួយ​សហគ្រាសកែច្នៃផលិតផលត្រីនៅកម្ពុជាដទៃទៀត ដើម្បីធានាថា ប្រតិបត្តិករជលផល បាន​អនុវត្តការត្រួតពិនិត្យគុណភាព និងអនាម័យ ដើម្បីឱ្យផលិតផលជលផលមានស្តង់ដារ សុវត្ថិភាព អនុលោមតាមបទបញ្ញាត្តិជាតិ និងលក្ខខណ្ឌតម្រូវ នៃសុវត្ថិភាពម្ហូបអាហារអន្តរជាតិ៕ អត្ថបទ៖ ឈិត បូរ៉ាវី