មហាសេដ្ឋីភេសជ្ជៈរបស់ប្រទេសវៀតណាម ត្រូវបានកាត់ទោសឲ្យជាប់ពន្ធនាគាររយៈពេល ៨ឆ្នាំ នៅថ្ងៃព្រហស្បតិ៍ (ទី២៥ ខែមេសា) នេះ ក្នុងសំណុំរឿងឆបោកពាក់ព័ន្ធនឹងទឹកប្រាក់ចំនួន ៤០លានដុល្លារអាមេរិក ដោយរូបលោកគឺជាធុរជនដ៏មានកេរ្តិ៍ឈ្មោះចុងក្រោយបង្អស់ ដែលត្រូវបានចាប់ខ្លួននៅក្នុងកិច្ចប្រឹងប្រែងបង្ក្រាបអំពើពុករលួយដ៏ខ្លាំងក្លារបស់ប្រទេសនេះ។

យុទ្ធនាការដ៏ទូលំទូលាយ ដើម្បីលុបបំបាត់អំពើពុករលួយដែលនៅត្រាំត្រែងក្នុងប្រទេសកុម្មុយនីស្តមួយនេះ បានឃើញថា មនុស្សជាង ៤.៤០០នាក់ ត្រូវបានចោទប្រកាន់ពីបទល្មើសព្រហ្មទណ្ឌ ក្នុងមានរួមទាំងមន្ត្រី និងឥស្សរជនធុរកិច្ចជាន់ខ្ពស់ជាច្រើនរូបផងដែរ។

តុលាការនៅទីក្រុងហូជីមិញ បានរកឃើញថា លោក Tran Qui Thanh និងកូនស្រី ២នាក់របស់លោក មានទោសពីបទឆបោកអ្នកវិនិយោគលើប្រាក់កម្ចី ដែលត្រូវបានផ្ដល់ឲ្យក្នុងឆ្នាំ២០១៩ និងឆ្នាំ២០២០។ ប្រព័ន្ធផ្សព្វផ្សាយរដ្ឋ បានរាយការណ៍ថា លោក Thanh វ័យ ៧១ឆ្នាំ ដែលជាប្រធានក្រុមហ៊ុនភេសជ្ជៈ Tan Hiep Phat ត្រូវបានតុលាការសម្រេចថា បានរៀបចំការឆបោក ដើម្បីដកយកទ្រព្យសម្បត្តិទុក ដោយដាក់ជាប្រាក់ធានាសម្រាប់ប្រាក់កម្ចី។

សូម្បីតែពេលដែលអ្នកខ្ចីបានសងប្រាក់ដោយមានការប្រាក់ក៏ដោយ ក៏លោក Thanh បដិសេធមិនព្រមប្រគល់ទ្រព្យសម្បត្តិឲ្យវិញដែរ ដោយលើកឡើងពីហេតុផលផ្សេងៗ ក្នុងរួមទាំងការអះអាងថា អ្នកទាំងនោះបានបាត់បង់សិទ្ធិទិញត្រឡប់វិញរបស់ខ្លួន ដោយសារការបំពានកិច្ចសន្យា។

ជាមួយគ្នានេះ តុលាការបានកាត់ទោសកូនស្រីវ័យ ៤៣ឆ្នាំរបស់លោក Thanh គឺលោកស្រី Tran Uyen Phuong ដែលជាអគ្គនាយិការងរបស់ក្រុមហ៊ុន ឲ្យជាប់ពន្ធនាគារ ៤ឆ្នាំ។ ចំណែកកូនស្រីពៅឈ្មោះ Tran Ngoc Bich វ័យ ៤០ឆ្នាំ ត្រូវបានផ្ដន្ទាទោសឲ្យជាប់ពន្ធនាគារ ៣ឆ្នាំ។

គួរបញ្ជាក់ដែរថា នៅក្នុងសំណុំរឿងក្លែងបន្លំប្រាក់ដ៏ធំបំផុតមួយក្នុងប្រវត្តិសាស្ត្ររបស់ប្រទេសនេះ មហាសេដ្ឋិនីផ្នែកអចលនទ្រព្យ គឺលោកស្រី Truong My Lan កាលពីដើមខែនេះ ត្រូវបានកាត់ទោសប្រហារជីវិតពីបទរៀបចំការឆបោក ដែលបណ្តាលឲ្យមានការខាតបង់ប្រមាណ ២៧ពាន់លានដុល្លារ៕