ទីភ្នាក់ងារសារព័ត៌មានរដ្ឋ TASS របស់រុស្ស៊ី នៅថ្ងៃព្រហស្បតិ៍ (ទី២៥ ខែមេសា) នេះ បានរាយការណ៍ថា ប្រធានាធិបតីបេឡារុស លោក Alexander Lukashenko បាននិយាយថា មានភាពជាប់គាំងនៅខ្សែត្រៀមជួរមុខរបស់អ៊ុយក្រែន ហើយស្ថានភាពមានលក្ខណសម្បត្តិគ្រប់គ្រាន់ហើយ ពោលគឺដល់ពេលត្រូវចាប់ផ្តើមកិច្ចចរចាសន្តិភាព។

លោក Lukashenko បានលើកឡើងថា ខ្លឹមសារពីដំបូងដែលត្រូវបានលើកយកមកពិភាក្សា រវាងមន្ត្រីរុស្ស៊ី និងអ៊ុយក្រែននៅក្នុងប្រទេសទួរគី កាលពីប៉ុន្មានសប្តាហ៍ដំបូងនៃសង្រ្គាម អាចប្រើជាចំណុចចាប់ផ្តើម សម្រាប់ការចរចានេះ។

ជាមួយគ្នានេះ សារព័ត៌មាន TASS ក៏បានដកស្រង់ផងដែរនូវសម្តីរបស់លោក Lukashenko ដែលជាសម្ព័ន្ធមិត្តដ៏ជិតស្និទ្ធរបស់ប្រធានាធិបតីរុស្ស៊ី លោក Vladimir Putin ដោយលោកនិយាយថា វាអាចជា «មហន្តរាយ» ប្រសិនបើរុស្ស៊ីប្រើអាវុធនុយក្លេអ៊ែរ ដើម្បីសងសឹកចំពោះសកម្មភាពរបស់លោកខាងលិចនោះ។

គួរបញ្ជាក់ថា រុស្ស៊ីបានព្រមានម្តងហើយម្តងទៀតថា ការគាំទ្ររបស់លោកខាងលិច ចំពោះអ៊ុយក្រែន កំពុងធ្វើឲ្យមានការប្រឈមមុខដាក់គ្នាដោយផ្ទាល់ជាមួយរុស្ស៊ី ហើយអាចនាំឲ្យមានជម្លោះនុយក្លេអ៊ែរ៕