អំឡុងសន្និសីទកងទ័ពជើងទឹកប៉ាស៊ីហ្វិកខាងលិច នៅទីក្រុង Qingdao ប្រទេសចិន ក្នុងសប្តាហ៍នេះ អ្នកនាំពាក្យក្រសួងការពារជាតិចិន នាថ្ងៃព្រហស្បតិ៍ (២៥ មេសា) នេះ បាននិយាយថា មន្ត្រីយោធាជាន់ខ្ពស់ចិន បានជួបប្រជុំដាច់ដោយឡែកពីគ្នាជាមួយសមភាគីកងទ័ពជើងទឹកអាមេរិក និងរុស្សី។
អ្នកនាំពាក្យលោក Wu Qian បានប្រាប់សន្និសីទសារព័ត៌មាននៅទីក្រុងប៉េកាំងថា មេបញ្ជាការកងទ័ពជើងទឹករបស់ចិនឧត្តមនាវីឯកលោក Hu Zhongming និងស្នងការនយោបាយ លោក Yuan Huazhi មានការផ្លាស់ប្តូរទស្សនៈស៊ីជម្រៅជាមួយប្រមុខកងនាវាចរប៉ាស៊ីហ្វិករបស់សហរដ្ឋអាមេរិក គឺឧត្តមនាវីឯកលោក Stephen Koehler និងមេបញ្ជាការកងទ័ពជើងទឹករុស្ស៊ីឧត្តមនាវីឯក លោក Alexander Moiseyev។
ការបញ្ជាក់អំពីជំនួប រវាងលោក Hu និងលោក Kohler នេះ គឺជាសញ្ញាចុងក្រោយបំផុតដែលបង្ហាញថា ទំនាក់ទំនងយោធាចិន-អាមេរិក កំពុងវិលទៅរកសភាពធម្មតាវិញហើយ បន្ទាប់ពីបាត់នូវការប្រាស្រ័យទាក់ទងគ្នា ក្រោយអតីតប្រធានសភាតំណាងរាស្ត្រ លោកស្រី Nancy Pelosi បានទៅបំពេញទស្សនកិច្ច នៅកោះតៃវ៉ាន់ ក្នុងខែសីហា ឆ្នាំ២០២២។
ជាមួយគ្នានេះ លោក Hu និងលោក Yuan ក៏បានជួបជាមួយសមភាគីកងទ័ពជើងទឹករបស់ពួកគេមកពីប្រទេសបារាំង ឈីលី និងកម្ពុជាផងដែរ ជាផ្នែកមួយនៃសន្និសីទដែលក៏រួមមានមន្ត្រីជប៉ុន ឥណ្ឌា អង់គ្លេស និងអូស្ត្រាលីដែរ ចំពេលមានភាពតានតឹងកើនឡើង ក្នុងតំបន់៕