មូលនិធិជនពិការ ជាស្ថាប័នរដ្ឋដែលទទួលខុសត្រូវលើការស្ដារកាយសម្បទា ជូនជនមានពិការភាពទូទាំងប្រទេសនៅកម្ពុជា ជារៀងរាល់ឆ្នាំ បានធ្វើការស្ដារកាយសម្បទាជូនជនមានពិការភាព ប្រមាណជិត ៣ម៉ឺននាក់ក្នុងមួយឆ្នាំ។ ជនមានពិការភាពជិត ២ម៉ឺននាក់ទៅទទួលសេវាស្ដារនៅមជ្ឈមណ្ឌលស្ដារដោយផ្ទាល់ រីឯជនមានពិការភាពជិត ១ម៉ឺននាក់ទៀតទទួលបានសេវាស្ដារនៅតាមសហគមន៍ ដោយក្រុមការងារជំនាញចុះទៅតាមមូលដ្ឋានដោយផ្ទាល់។ នេះជាការលើកឡើងរបស់ ឯកឧត្តម ខុម ផលលឿន នាយកមូលនិធិជនពិការ។
ការងារស្ដារកាយសម្បទា ជាការងារស្នូលមួយនៃមូលនិធិជនពិការ។ បច្ចុប្បន្នស្ថាប័ននេះ គ្រប់គ្រងលើមជ្ឈមណ្ឌលស្ដារលទ្ធភាពពលកម្មកាយសម្បទាចំនួន ១១ កន្លែង រោងជាងជួសជុលចំនួន ៣ មជ្ឈមណ្ឌលស្តារលទ្ធភាពពលកម្មអ្នកជំងឺរបួសខួរឆ្អឹងខ្នងចំនួន ១ និងរៀងចក្រផលិតអវយវៈចំនួន ១ ដើម្បីចូលរួមក្នុងការផ្ដល់សេវវាស្ដារលទ្ធភាពពលកម្មកាយសម្បទាជូនជនមានពិការភាពនៅកម្ពុជា។
ឯកឧត្តម ខុម ផលលឿន បានថ្លែងថា ជារៀងរាល់ឆ្នាំ មូលនិធិជនពិការ បានផ្ដល់ការស្ដារកាយសម្បទាជូនជនមានពិការភាពប្រមាណជិត ៣ម៉ឺននាក់ក្នុងមួយឆ្នាំ។ ការផ្ដល់សេវាស្ដារនៅតាមមជ្ឈមណ្ឌល គឺមានប្រមាណ ២៨ ០០០នាក់។ រីឯការចុះទៅតាមសហគមន៍ ដើម្បីផ្ដល់សេវាជូនជនមានពិការភាពក៏សម្រេចបានជិត ១០ ០០០នាក់ក្នុងមួយឆ្នាំផងដែរ។
ឯកឧត្តមបញ្ជាក់ដែរថាការផ្ដល់សេវានេះ គឺមានតម្លាភាព គ្មានការបង់ប្រាក់នោះទេ ទាំងជនមានពិការភាពមានជីវភាពក្រីក្រ និងជនមានពិការភាពដែលមានជីវភាពល្អប្រសើរ។
ស្របពេលដែលមកទទួលសេវាស្ដារជាលើកដំបូង លោក ជ្រឹក វិចិត្រ ជាជនពិការជើងម្ខាង លើកឡើងថា ការមកទទួលសេវាស្ដារកាយសម្បទាដោយមិនគិតថ្លៃនេះ ជាក្ដីសង្ឃឹមថ្មីសម្រាប់រូបលោក។ លោកចង់បានជីវិតមួយដែល មិនពឹងផ្អែកលើមនុស្សដទៃគ្រប់បែបយ៉ាងនោះទេ។
សូមជម្រាបថា បច្ចុប្បន្នសម្រាប់ជនមានពិការភាព ដែលអាចទៅទទួលសេវាស្ដារនៅតាមមជ្ឈមណ្ឌលស្ដារកាយសម្បទាបាន រួមមាន ដាច់អវយវៈ ពិការ ឬខ្សោយមួយចំហៀងខ្លួន ពិការឬខ្សោយមួយកំណាត់ខ្លួន ពិការ ឬខ្សោយអវយវៈទាំង ៤ វៀចកពីកំណើត ជើងខ្លីមួយចំហៀង ពិការចលករខួរក្បាល វៀចប្រអប់ជើង ពិការស្វិតដៃជើង ជំងឺដែលមានបញ្ហាសន្លាក់ ចុះខ្សោយសាច់ដុំ និងពិការរាងកាយផ្សេងៗ៕ អត្ថបទ៖ គឹម ហុក