កាលថ្ងៃពុធ (ទី២៤ ខែមេសា) ប្រធានាធិបតីអាមេរិកលោក Joe Biden បានចុះហត្ថលេខាលើសំណើច្បាប់ដែលនឹងហាមឃាត់ TikTok ប្រសិនបើម្ចាស់របស់បណ្ដាញសង្គមនេះ គឹក្រុមហ៊ុន ByteDance មិនព្រមលក់កម្មវិធីនេះនោះទេ។ សេចក្ដីស្នើច្បាប់តម្រូវឲ្យក្រុមហ៊ុន ByteDance ឈានដល់កិច្ចព្រមព្រៀងមួយ ក្នុងរង្វង់រយៈពេល ៩ខែ ហើយមានរយៈពេល ៩០ថ្ងៃទៀត ដើម្បីបញ្ចប់កិច្ចព្រមព្រៀងនោះ។ បន្ទាប់ពីថ្ងៃផុតកំណត់នេះ សហរដ្ឋអាមេរិកនឹងហាមឃាត់កម្មវិធី ឬអេបនេះមិនឲ្យមានក្នុងបញ្ជីកម្មវិធីប្រើប្រាស់ ក្នុងឧបករណ៍ផ្សេងៗ ដូចជាទូរសព្ទជាដើម។

ប្រាកដណាស់ TikTok នឹងតវ៉ាជំទាស់ចំពោះការសម្រេចនេះនៅតុលាការជាមួយនឹងការតស៊ូផ្លូវច្បាប់រយៈពេលយូរ។ ប៉ុន្តែកម្មវិធីនេះត្រូវបានប្រទេសជាច្រើននៅទូទាំងពិភពលោកហាមឃាត់រួចហើយ ហើយ ByteDance ក៏មិនអាចធ្វើឲ្យអេបដ៏ពេញនិយមនេះរស់ឡើងវិញដែរ។ ចំណាត់ការទាំងនេះបានជះឥទ្ធិពលដល់ប្រតិបត្តិការរបស់ ByteDance នៅក្នុងប្រទេសទាំងនោះ ជាពិសេសអ្នកបង្កើត ក៏ដូចជាការចាប់ផ្តើមអាជីវកម្មដែលទាក់ទងនឹងសេដ្ឋកិច្ចអ្នកបង្កើតមាតិកាផងដែរ។

ហើយនេះគឺរបៀបដែល TikTok ត្រូវបានប្រទេសផ្សេងៗហាមឃាត់។ ក្នុងខែមិថុនា ឆ្នាំ២០២០ រដ្ឋាភិបាលឥណ្ឌាបានហាមឃាត់កម្មវិធីវីដេអូខ្លី រួមជាមួយនឹងកម្មវិធីរបស់ចិនជាច្រើនទៀត ដោយលើកឡើងពីហេតុផលសន្តិសុខជាតិ ហើយនេះប្រហែលជាការហាមប្រាមដ៏ល្បីបំផុតមួយ ព្រោះប្រទេសឥណ្ឌា គឺជាទីផ្សារអ្នកប្រើប្រាស់ដ៏ធំបំផុតមួយនៅក្នុងពិភពលោក។ នៅឆ្នាំ២០២២ ពួកតាលីបង់របស់ប្រទេសអាហ្វហ្គានីស្ថាន បានបិទ TikTok ដោយប្រាប់ថា «ធ្វើឲ្យយុវជនវង្វែង»។ អ៊ូសបេគីស្ថានបានដាក់កម្រិតលើការប្រើប្រាស់ TikTok ក្នុងប្រទេស ចាប់តាំងពីខែកក្កដា ឆ្នាំ២០២១ ហើយក្នុងឆ្នាំ២០២២ សមាជិកសភាបានស្នើឲ្យហាមឃាត់ទាំងស្រុងតែម្ដង។ នៅខែសីហា ឆ្នាំ២០២៣ សេណេហ្គាល់បានបិទ TikTok បន្ទាប់ពីមានការកាត់ទោសមេដឹកនាំប្រឆាំងលោក Ousmane Sonko។ ប្រជាពលរដ្ឋបានប្រើវេទិកានេះដើម្បីចុះឈ្មោះអ្នកប្រឆាំងដែលជាលទ្ធផលត្រូវបានហាមឃាត់ទាំងស្រុង។ សូម៉ាលីបានហាមឃាត់ TikTok រួមជាមួយ Telegram ក្នុងពេលវេលាប្រហែលៗគ្នានឹងសេណេហ្គាល់។ អាជ្ញាធរសូម៉ាលីបានលើកឡើងថា វេទិកាទាំងនេះត្រូវបានប្រើ ដើម្បី «ផ្សព្វផ្សាយខ្លឹមសារដ៏គួរឲ្យរន្ធត់ និងព័ត៌មានមិនពិតដល់សាធារណជន»។

ខែសីហា ឆ្នាំ២០២៣ មិនមែនជាខែដ៏អស្ចារ្យ សម្រាប់ TikTok ទេ ព្រោះអាជ្ញាធរកៀហ្ស៊ីស៊ីស្ថាន ក៏បានរារាំងវេទិកានេះផងដែរ ដោយចាត់ទុកថា បណ្ដាញសង្គមនេះថា បង្កគ្រោះថ្នាក់ដល់ «សុខភាព និងការវិវត្តន៍របស់កុមារ»។ ចំណែកនេប៉ាល់បានហាមឃាត់ TikTok ក្នុងខែវិច្ឆិកា ឆ្នាំ២០២៣ ដោយសាររដ្ឋាភិបាលជឿថា កម្មវិធីនេះបានរំខានដល់ »សុខុមាលភាពសង្គម» និងមានឥទ្ធិពលលើ «រចនាសម្ព័ន្ធគ្រួសារ និងសង្គម»។

ដូច្នេះជារួម ផលប៉ះពាល់ពីការហាមឃាត់ TikTok នឹងកើតមានចៀសមិនរួចឡើយ។ របាយការណ៍ជាច្រើនបានលើកយកពីឥទ្ធិពលនៃការហាមប្រាម TikTok នេះ ចំពោះអ្នកបង្កើតមាតិកា ដែលពឹងផ្អែកលើវេទិកាវីដេអូខ្លីៗ ដើម្បីទទួលបានកេរ្តិ៍ឈ្មោះ និងរកប្រាក់ចំណូល។ អាជីវកម្មខ្នាតតូចជាច្រើន ក៏ប្រើ TikTok ដើម្បីផ្សព្វផ្សាយម៉ាកផលិតផលរបស់ពួកគេដែរ តាមវិធីផ្សេងៗគ្នា៕