ប្រភពចំនួន៤ បានប្រាប់ឲ្យដឹងថា ម្ចាស់បណ្ដាញសង្គម TikTok គឺក្រុមហ៊ុន ByteDance ចង់បិទជាជាងលក់កម្មវិធីដែលធ្វើឲ្យមានការខាតបង់របស់ខ្លួននេះឲ្យទៅជនជាតិអាមេរិក ប្រសិនបើក្រុមហ៊ុនចិនមួយនេះអស់ជម្រើសផ្លូវច្បាប់ ក្នុងការតវ៉ាជំទាស់នឹងច្បាប់ ដែលហាមឃាត់វេទិកានេះពីកម្មវិធីក្នុងឧបករណ៍ផ្សេងៗ ដូចជាទូរសព្ទដៃជាដើម នៅសហរដ្ឋអាមេរិក។

ប្រភពជិតស្និទ្ធនឹងក្រុមហ៊ុនមេរបស់បណ្ដាញសង្គមនេះ បានឲ្យដឹងថា ប្រព័ន្ធដំណើរការដែល TikTok ពឹងផ្អែកដើម្បីធ្វើប្រតិបត្តិការ ត្រូវបានចាត់ទុកថា ជាស្នូលចំពោះប្រតិបត្តិការទាំងមូលរបស់ក្រុមហ៊ុន ByteDance ដែលនឹងធ្វើឲ្យការលក់កម្មវិធីជាមួយប្រព័ន្ធនោះត្រូវបានសង្ស័យ។ ក្រុមហ៊ុន ByteDance បាននិយាយថា TikTok បង្កើតបានជាចំណែកតូចមួយនៃប្រាក់ចំណូលសរុបរបស់ក្រុមហ៊ុន និងអ្នកប្រើប្រាស់សកម្មប្រចាំថ្ងៃ ដូច្នេះក្រុមហ៊ុនចង់ឲ្យកម្មវិធី ឬអេបនេះបិទនៅសហរដ្ឋអាមេរិក ក្នុងស្ថានភាពដ៏អាក្រក់បំផុតជាជាងលក់ឲ្យទៅអ្នកទិញជនជាតិអាមេរិក។

ដោយនិយាយក្នុងលក្ខខណ្ឌមិនបញ្ចេញឈ្មោះ ប្រភពទាំងនោះបានប្រាប់ថា ការបិទនឹងមានផលប៉ះពាល់លើអាជីវកម្មមានកម្រិតរបស់ ByteDance ខណៈពេលដែលក្រុមហ៊ុននឹងមិនត្រូវបោះបង់ចោលប្រព័ន្ធដំណើរការស្នូលរបស់ខ្លួននោះទេ។ ពាក់ព័ន្ធនឹងការលើកឡើងនេះ ក្រុមហ៊ុន ByteDance បានបដិសេធមិនធ្វើអត្ថាធិប្បាយអ្វីឡើយ។

នាយកប្រតិបត្តិរបស់ TikTok លោក Chew Shou Zi បាននិយាយកាលថ្ងៃទី២៤ ខែមេសាថា ក្រុមហ៊ុនបណ្ដាញសង្គមនេះរំពឹងថា នឹងឈ្នះការតស៊ូផ្នែកផ្នែកច្បាប់ ដើម្បីរារាំងច្បាប់ដែលត្រូវបានបានចុះហត្ថលេខាឲ្យក្លាយជាច្បាប់ធរមានដោយប្រធានាធិបតីអាមេរិក លោក Joe Biden ដែលលោកនាយកប្រតិបត្តិបាននិយាយថា នឹងហាមឃាត់កម្មវិធីវីដេអូខ្លីដ៏ពេញនិយមរបស់បណ្ដាញសង្គមនេះ ដែលត្រូវបានប្រើប្រាស់ដោយជនជាតិអាមេរិកចំនួន ១៧០លាននាក់៕