ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ថា លោក គ្រោងនឹងទៅបំពេញទស្សនកិច្ច នៅប្រទេសចិនក្នុងខែឧសភា ដែលជាគម្រោងធ្វើដំណើរលើកដំបូងរបស់ខ្លួន នៅក្រៅប្រទេស ចាប់តាំងពីការបោះឆ្នោតឡើងវិញ ខណៈដែលទីក្រុងមូស្គូ ស្វែងរកទំនាក់ទំនងកាន់តែស៊ីជម្រៅ ជាមួយទីក្រុងប៉េកាំង។
ប្រទេសលោកខាងលិច បានមើលរុស្ស៊ី និងចិនថា មានការបង្កើនកិច្ចខិតខំប្រឹងប្រែងខ្លាំង ក្នុងរយៈពេលពីរឆ្នាំចុងក្រោយនេះ ខណៈដែលពួកគេ ជំរុញកិច្ចសហប្រតិបត្តិការយោធា និងស្វែងរកការពង្រីកឥទ្ធិពលសកលរបស់ពួកគេ។
លោកពូទីន បាននិយាយនៅឯវេទិកាធុរកិច្ច នៅទីក្រុងមូស្គូ ដោយមិនផ្តល់ព័ត៌មានលម្អិតថា៖«ដំណើរទស្សនកិច្ច នៅខែឧសភា ត្រូវបានគ្រោងទុក» ។ មេដឹកនាំរុស្ស៊ីរូបនេះ បានធ្វើទស្សនកិច្ចចុងក្រោយនៅប្រទេសចិន ក្នុងខែតុលា ឆ្នាំ២០២៣។
រយៈពេលប៉ុន្មានថ្ងៃមុនពេលរុស្ស៊ីចាប់ផ្តើមការវាយប្រហារយោធាទ្រង់ទ្រាយធំរបស់ខ្លួនលើអ៊ុយក្រែន ក្នុងខែកុម្ភៈ ឆ្នាំ ២០២២ ទីក្រុងប៉េកាំង និងទីក្រុងមូស្គូ បានប្រកាសភាពជាដៃគូ «គ្មានដែនកំណត់» ហើយចាប់តាំងពីពេលនោះមក បានជំរុញពាណិជ្ជកម្ម ឲ្យកើនឡើងខ្ពស់បំផុត។
ទីក្រុងមូស្គូ បានសម្លឹងមើលទៅប្រទេសចិនថាជាខ្សែជីវិតសេដ្ឋកិច្ចដ៏សំខាន់ ចាប់តាំងពីលោកខាងលិច បានវាយប្រហាររុស្ស៊ីជាមួយនឹងទណ្ឌកម្មដែលមិនធ្លាប់មានពីមុនមក ទៅលើការវាយលុកយោធារបស់ ខ្លួន។
ទន្ទឹមនឹងនេះ ប្រទេសចិន បានទទួលផលប្រយោជន៍ពីការនាំចូលថាមពលពីរុស្ស៊ី ដែលមានតំលៃថោក និងការទទួលបានធនធានធម្មជាតិដ៏ច្រើន រួមទាំងការដឹកជញ្ជូនឧស្ម័នឥតឈប់ឈរ តាមរយៈបំពង់បង្ហូរ ប្រេង Power of Siberia។