ប្រធានាធិបតីអាមេរិក Joe Biden បានធ្វើដំណើរទៅកាន់ទីក្រុង Syracuse រដ្ឋ New York កាលពីថ្ងៃព្រហស្បតិ៍ (ទី២៥ ខែមេសា) ដោយបង្ហាញពីកិច្ចខិតខំប្រឹងប្រែង ដើម្បីនាំយកការផលិតបន្ទះឈីបមកកាន់សហរដ្ឋអាមេរិកវិញ និងជំរុញភាពធន់នៃខ្សែសង្វាក់ផ្គត់ផ្គង់។
គួបញ្ជាក់ថា នៅមុននេះ សេតវិមានបានរាយការណ៍ពីកិច្ចព្រមព្រៀងបឋមជាមួយក្រុមហ៊ុនផលិតបន្ទះឈីបអង្គចងចាំ Micron Technology សម្រាប់ការឧបត្ថម្ភធនរហូតដល់ ៦,១៤ពាន់លានដុល្លារ ដល់រោងចក្រផលិតបន្ទះឈីបចំនួន២។
កិច្ចព្រមព្រៀងដែលបានចុះហត្ថលេខាដោយក្រសួងពាណិជ្ជកម្មសហរដ្ឋអាមេរិក នឹងផ្តល់មូលនិធិដល់រោងចក្រ នៅរដ្ឋ New York និង Idaho ដែលមានគោលបំណងជំរុញការផលិតបន្ទះឈីបក្នុងស្រុក និងកាត់បន្ថយការពឹងផ្អែកលើការផ្គត់ផ្គង់ពីប្រទេសចិន និងកោះតៃវ៉ាន់។
សេតវិមានបាននិយាយថា លោក Biden ដែលកំពុងឈរឈ្មោះ ដើម្បីស្វែងរកការជាប់ឆ្នោតឡើងវិញក្នុងការបោះឆ្នោតប្រធានាធិបតីខែវិច្ឆិកា បានប្រើប្រាស់ដំណើរទស្សនកិច្ចរបស់លោកទៅកាន់ទីក្រុង Syracuse ដើម្បីបង្ហាញពីកិច្ចខិតខំប្រឹងប្រែងរបស់រដ្ឋបាលរបស់លោក ក្នុងការធ្វើឲ្យផលិតកម្មសហរដ្ឋអាមេរិករស់ឡើងវិញ និងពង្រឹងសន្តិសុខជាតិ៕