ក្រុមនេះ និងយោធាអ៊ីស្រាអែល បាននិយាយនៅថ្ងៃសុក្រនេះថា ក្រុមសកម្មប្រយុទ្ធហេសបូឡានៅប្រទេសលីបង់ បានបាញ់មីស៊ីលប្រឆាំងរថក្រោះ និងគ្រាប់កាំភ្លើងធំ ទៅលើកាន់ក្បួនរថយន្តយោធាអ៊ីស្រាអែល នៅក្នុងតំបន់ជម្លោះមួយ នៅតាមបណ្តោយព្រំដែន ដោយបានសម្លាប់ជនស៊ីវិលអ៊ីស្រាអែលម្នាក់។

ក្រុមហេសបូឡា បានអះអាងថា យុទ្ធជនរបស់ខ្លួន បានវាយឆ្មក់ក្បួនរថយន្តនេះ ភ្លាមៗមុនពាក់កណ្តាលអធ្រាត្រថ្ងៃព្រហស្បតិ៍ ដោយបានបំផ្លាញរថយន្តពីរគ្រឿង។ យោធាអ៊ីស្រាអែល បាននិយាយថា ការវាយប្រហារនោះ បានធ្វើឲ្យជនស៊ីវិលអ៊ីស្រាអែលម្នាក់ដែលកំពុងធ្វើការងារហេដ្ឋារចនាសម្ព័ន្ធ រងរបួស ហើយក្រោយមកគាត់ បានស្លាប់ដោយសាររបួសនោះ។

ការប្រយុទ្ធគ្នាកម្រិតទាបនៅតាមព្រំដែនអ៊ីស្រាអែល-លីបង់ បានគំរាមកំហែងម្តងហើយម្តងទៀតថា នឹងផ្ទុះឡើង ខណៈដែលអ៊ីស្រាអែល បានកំណត់គោលដៅលើក្រុមសកម្មប្រយុទ្ធហេសបូឡាជាន់ខ្ពស់ ក្នុងប៉ុន្មានខែថ្មីៗនេះ។

មនុស្សរាប់ម៉ឺននាក់ ត្រូវបានជម្លៀសនៅតាមព្រំដែនទាំងពីរ។ ខាងអ៊ីស្រាអែល ការប្រយុទ្ធគ្នាឆ្លងព្រំដែនបានសម្លាប់ជនស៊ីវិល១០នាក់ និងទាហាន១២នាក់ ខណៈនៅប្រទេសលីបង់ មនុស្សជាង៣៥០នាក់ បានស្លាប់ ក្នុងនោះមានជនស៊ីវិល៥០នាក់ និងសមាជិកក្រុមហេសបូឡា ២៧១នាក់។