មន្ត្រីយោធាជាន់ខ្ពស់របស់សហរដ្ឋអាមេរិក បានប្រាប់សារព័ត៌មានAPកាលពីថ្ងៃពុធថា ពុំទាន់មានការសម្រេចចិត្តចុងក្រោយថាតើកងទ័ពអាមេរិកទាំងអស់ នឹងចាកចេញពីប្រទេសនីហ្សេ និងឆាដ ជាប្រទេសអាហ្វ្រិកចំនួនពីរ ដែលមានសារៈសំខាន់ចំពោះកិច្ចខិតខំប្រឹងប្រែងរបស់យោធា ក្នុងការទប់ទល់នឹងអង្គការជ្រុលនិយមហិង្សា នៅទូទាំងតំបន់សាហែល ( Sahel) នោះទេ។
របបយោធាដែលកំពុងកាន់អំណាចរបស់នីហ្សេ បានបញ្ចប់កិច្ចព្រមព្រៀងមួយកាលពីខែមុន ដែលអនុញ្ញាតឲ្យទាហានអាមេរិកធ្វើប្រតិបត្តិការនៅក្នុងប្រទេសអាហ្វ្រិកខាងលិច។ ក្រសួងការបរទេស បាននិយាយកាលពីយប់ថ្ងៃពុធថា មន្ត្រីសហរដ្ឋអាមេរិក និងនីហ្សេ នឹងជួបប្រជុំគ្នា នៅថ្ងៃព្រហស្បតិ៍ នៅរដ្ឋធានីនីញ៉ាម៉េ ដើម្បី«ផ្តួចផ្តើមការពិភាក្សាស្តីពីការដកទ័ពអាមេរិកដោយរបៀបរៀបរយ និងប្រកបដោយការទទួលខុសត្រូវ»។
អ្នកនាំពាក្យក្រសួងការបរទេសលោក Matthew Miller បានថ្លែងថា កិច្ចប្រជុំនោះ ធ្វើឡើងនៅពេលដែលប្រទេសទាំងពីរ «មិនអាចឈានដល់ការយោគយល់គ្នា» ដើម្បីបន្តកិច្ចសហប្រតិបត្តិការ «ក្នុងលក្ខណៈដែលដោះស្រាយតម្រូវការ និងកង្វល់របស់ភាគីនីមួយៗ» ។
អនុប្រធានអគ្គសេនាធិការចម្រុះលោក Christopher Grady ដែលជាមន្ត្រីយោធាលំដាប់ខ្ពស់បំផុតទីពីររបស់ប្រទេសនេះ បាននិយាយនៅក្នុងបទសម្ភាសន៍មួយថា ក្នុងរយៈពេលប៉ុន្មានថ្ងៃថ្មីៗនេះ រដ្ឋាភិបាលនៃប្រទេសជិតខាងឆាដ ក៏បានចោទសួរអំពីកិច្ចព្រមព្រៀងរបស់ខ្លួនជាមួយសហរដ្ឋអាមេរិកផងដែរ។
កិច្ចព្រមព្រៀងនេះ អនុញ្ញាតឲ្យសហរដ្ឋអាមេរិក ធ្វើប្រតិបត្តិការប្រឆាំងភេរវកម្មដ៏សំខាន់ នៅក្នុងព្រំដែនរបស់ប្រទេសនេះ និងបានគាំទ្រការបណ្តុះបណ្តាលដៃគូយោធា នៅក្នុងប្រទេសទាំងពីរ។ ការកែប្រែការសម្រេចចិត្តនេះ បានជំរុញឲ្យមានការព្រួយបារម្ភថា ឥទ្ធិពលរបស់សហរដ្ឋអាមេរិក នៅក្នុងទ្វីបអាហ្រ្វិក កំពុងបាត់បង់ ដោយសារមានការដណ្តើមយកពីប្រទេសរុស្ស៊ី និងចិន។