នៅថ្ងៃសុក្រ (ទី២៦ ខែមេសា) នេះ ក្រុមនិស្សិតបាននាំគ្នាបិទការចូលទៅកាន់សកលវិទ្យាល័យ Sciences Po ដែលជាសកលវិទ្យាល័យដ៏មានកិត្យានុភាពរបស់ទីក្រុងប៉ារីស ប្រទេសបារាំង ដោយទាមទារឲ្យស្ថាប័ននេះថ្កោលទោស ចំពោះសកម្មភាពរបស់អ៊ីស្រាអែល ជុំវិញសង្រ្គាម នៅតំបន់ហ្កាហ្សា ពោលគឺជាការតវ៉ាមួយ ដែលធ្វើតាមបាតុកម្មស្រដៀងគ្នានេះ ក្នុងបរិវេណសាលា នៅសហរដ្ឋអាមេរិក។

ដោយស្រែកគាំទ្រប្រជាជនប៉ាឡេស្ទីន សិស្សទាំងនោះបានបង្ហាញទង់ជាតិប៉ាឡេស្ទីនតាមបង្អួច និងពីលើច្រកចូលអគារសកលវិទ្យាល័យ។ មនុស្សជាច្រើនបានរុំក្បាលដោយក្រមាពណ៌សខ្មៅ ដែលបានក្លាយជានិមិត្តរូបនៃសាមគ្គីភាពជាមួយតំបន់ហ្កាហ្សា។

និស្សិតឈ្មោះ Hicham អាយុ ២២ឆ្នាំដែលជានិស្សិតថ្នាក់បរិញ្ញាបត្រជាន់ខ្ពស់សិក្សាផ្នែកសិទ្ធិមនុស្ស និងមនុស្សធម៌ នៅសកលវិទ្យាល័យ Sciences Po បាននិយាយថា៖ «នៅពេលយើងឃើញអ្វីដែលកំពុងកើតឡើងនៅសហរដ្ឋអាមេរិក ហើយឥឡូវនេះ នៅប្រទេសអូស្ត្រាលី យើងពិតជាសង្ឃឹមថា វានឹងកើតមាននៅទីនេះ ក្នុងប្រទេសបារាំង»។ រូបគេបានប្រាប់បន្ថែមថា និស្សិតចង់ឲ្យសកលវិទ្យាល័យ Sciences Po ថ្កោលទោសទង្វើរបស់អ៊ីស្រាអែល។

និស្សិតថ្នាក់បរិញ្ញាបត្រជាន់ខ្ពស់មា្នក់ទៀតឈ្មោះ Zoe អាយុ ២០ឆ្នាំ ដែលសិក្សាផ្នែករដ្ឋបាលសាធារណៈ នៅសកលវិទ្យា Sciences Po នេះដែរ បាននិយាយថា៖ «យើងរីករាយណាស់ដែល (និស្សិតនៅ) សាកលវិទ្យាល័យកាន់តែច្រើនឡើងបានប្រមូលផ្តុំ។ យើងសង្ឃឹមថា វានឹងរីករាលដាលដល់គ្រប់សកលវិទ្យាល័យទាំងអស់ ហើយលើសពីនេះទៀត យើងនឹងមិនបោះបង់ រហូតដល់អំពើប្រល័យពូជសាសន៍ នៅហ្កាហ្សា បញ្ចប់»។

មន្ត្រីរបស់សកលវិទ្យាល័យ Science Po មិនបានឆ្លើយតបនឹងសំណើសុំការអត្ថាធិប្បាយទេ។ ប្រព័ន្ធផ្សព្វផ្សាយបារាំង បានរាយការណ៍ថា កាលពីយប់ថ្ងៃពុធ (ទី២៤ ខែមេសា) នគរបាលបាននាំក្រុមនិស្សិតដំបូងចេញ ពេលពួកគេព្យាយាមបិទសាកលវិទ្យាល័យ Sciences Po នេះ ដោយការធ្វើបែបនោះត្រូវបានថ្កោលទោសដោយអ្នកនយោបាយឆ្វេងនិយម៕