នាយករដ្ឋមន្ត្រីថៃ លោក Srettha Thavisin (សេដ្ឋា ថាវីស៊ីន) បានជួបជាមួយសមភាគីបង់ក្លាដែស លោកស្រី Sheikh Hasina នៅថ្ងៃសុក្រ (២៦ មេសា) ក្នុងទីក្រុងបាងកក ជាកន្លែងដែលប្រទេសទាំង២ បានចុះហត្ថលេខាលើកិច្ចព្រមព្រៀង ដែលលើកកម្ពស់ពាណិជ្ជកម្ម ទេសចរណ៍ និងកិច្ចសហប្រតិបត្តិការថាមពល។
ក្នុងជំនួបនោះ ក្រៅពីការឈានដល់កិច្ចព្រមព្រៀងនានា ប្រទេសថៃក៏បានកោតសរសើរដល់ប្រទេសបង់ក្លាដែសផងដែរ សម្រាប់ការផ្ដល់ជំនួយមនុស្សធម៌ដល់ជនភៀសខ្លួនរ៉ូហ៊ីងយ៉ា ដែលបានភៀសខ្លួនចេញពីសហភាពមីយ៉ាន់ម៉ាទៅកាន់ប្រទេសអាស៊ីខាងត្បូងមួយនេះ ចាប់តាំងពីឆ្នាំ២០១៧ មក។
គួរបញ្ជាក់ថា វត្តមានរបស់លោកស្រី Hasina នៅក្នុងទីក្រុងបាងកក គឺជាផ្នែកនៃដំណើរទស្សនកចិ្ចផ្លូវការរយៈពេល ៦ថ្ងៃទៅកាន់ប្រជាជាតិអាស៊ីអាគ្នេយ៍មួយនេះ។
មេដឹកនាំរូបនេះត្រូវបានទទួលស្វាគមន៍ដោយពិធីស្វាគមន៍ដែលលោកស្រីបានត្រួតពិនិត្យឆ្មាំកិត្តិយសជាមួយលោក សេដ្ឋា មុនពេលគណៈប្រតិភូនៃប្រទេសទាំង២ បានអង្គុយពិភាក្សាគ្នា៕