អង្គការស្លាបព្រាកម្ពុជា បានសហការជាមួយចុងភៅជាតិនិងអន្ដរជាតិចំនួន៦ប្រទេស រួមគ្នាធ្វើមុខម្ហូបទទួលភ្ញៀវទេសចរ ដើម្បីរៃអង្គាសថវិកាសម្រាប់ជួយដល់យុវជនខ្វះខាត ដែលកំពុងរៀនជំនាញ លើវិស័យទេសចរណ៍ ។ការរៀបចំនេះ ធ្វើឡើងនៅល្ងាចថ្ងៃទី២៦ខែមេសាឆ្នាំ២០២៤ នៅអង្គការស្ថាបព្រាកម្ពុជា ស្ថិតនៅសង្កាត់សាលាកំរើក ក្រុងសៀមរាប។
លោកស្រី ម៉ៅ សុផាន់នី នាយិកាអង្គការស្លាបព្រាកម្ពុជា មានប្រសាសន៍ថា ការចំអិនម្ហូបនេះ មានចំនួន៥មុខផ្សេងៗគ្នា ដោយមិនគិតថ្លៃ ដែលក្នុងនោះក៏មានមុខម្ហូបបែបខ្មែរ មុខម្ហូបបែបស៊ុប និងសាច់ ព្រមទាំងបង្ហែម ដោយបានដាក់ទទួលភ្ញៀវទេសចរជាតិ និងអន្ដរជាតិប្រមាណជិត ១០០នាក់ ដើម្បីរៃអង្គាសថវិកាពីពួកគាត់ សម្រាប់ជួយដល់យុវជនដែលកំពុងរៀនជំនាញវិជ្ជាជីវៈកិច្ចលើវិស័យទេសចរណ៍នៅក្នុងអង្គការនេះ។
លោកស្រីបន្ដថា នៅឆ្នាំនេះ សិក្ខាកាមដែលកំពុងរៀនជំនាញបដិសណ្ឋារៈកិច្ចវិស័យទេសចរណ៍ នៅអង្គការស្លាបព្រាកម្ពុជានេះ មានចំនួន៧៥នាក់ ដែលពួកគាត់មកពីគ្រួសារក្រីក្រតាមទីជនបទដាច់ស្រយ៉ាល ដែលពួកគាត់ត្រូវបានបណ្ដុះបណ្ដាលលើជំនាញសេវាកម្មម្ហូបអាហារ និងភេសជ្ជៈ និងគេហៈកិច្ច ជំនាញធ្វើម្ហូប ជំនាញបារីស្តា/ឆុងកាហ្វេ ជាដើម។
ការបណ្ដុះបណ្ដាលនេះ ពួកគាត់ត្រូវបានអង្គការផ្គត់ផ្គង់ទាំងស្រុងលើកការស្នាក់នៅ ការហូបចុក សំលៀបំពាក់ ការរៀនសូត្រផ្សេងៗ ដូចនេះ ទើបអង្គការបាននាំយកចុងភៅល្បីៗមកពីក្រៅប្រទេស និងនៅក្នុងស្រុក ដើម្បីធ្វើម្ហូបទទួលស្វាគមន៍ភ្ញៀវទេសចរ តាមរយៈការលក់សំបុត្រ។ជាមួយគ្នានេះ ក្រុមសមាជិកចុងភៅអន្ដរជាតិ ក៏បានចូលរួមបរិច្ចាថវិកាសម្រាប់ជួយបណ្ដុះបណ្ដាលដល់យុវជនកម្ពុជាផងដែរ។
លោកស្រី ម៉ៅ សុផាន់នី បានបន្ថែមថា អង្គការស្លាបព្រាកម្ពុជា បានបង្កើតឡើងចាប់ពីឆ្នាំ២០០៩ ហើយមកដល់ថ្ងៃនេះ អង្គការនេះ បានបណ្ដុះបណ្ដាលដល់សិក្ខាកាមបានប្រមាណជាង៥០០នាក់ ក្នុងនោះជាស្ដ្រី៦០ភាគរយ ដែលភាគច្រើនពួកគាត់មកពីខេត្ដសៀមរាប ទីក្រុងភ្នំពេញ និងខេត្ដព្រះសីហនុ។
លោកស្រីបន្ថែមថា ការរៀនជំនាញនេះ មិនមានការបោះបង់ការសិក្សា ហើយ១០០ភាគរយពួកគាត់ត្រូវបានបំពេញការងារតាមសណ្ឋាគារ ភោជនីយដ្ឋាន ក៏ដូចជាផ្ទះសំណាក់ផងដែរ៕