ប្រទេសកូរ៉េខាងជើង នៅថ្ងៃសៅរ៍ (២៧ មេសា) នេះបានចោទប្រកាន់សហរដ្ឋអាមេរិក ថាបានធ្វើនយោបាយលើបញ្ហាសិទ្ធិមនុស្សនៅក្នុងប្រទេសអាស៊ីបូព៌ាមួយនេះ ដោយបានរិះគន់នូវអ្វីដែលហៅថាការញុះញង់ផ្នែកនយោបាយ និងការសមគំនិត។
ប្រព័ន្ធផ្សព្វផ្សាយរដ្ឋ KCNA បានដកស្រង់សម្តីអ្នកនាំពាក្យក្រសួងការបរទេសដែលនិយាយថា ទីក្រុងព្យុងយ៉ាង នឹងធ្វើការជ្រើសរើសយ៉ាងម៉ឺងម៉ាត់ និងដាច់ខាតដើម្បីការពារអធិបតេយ្យភាព និងសុវត្ថិភាពរបស់ខ្លួន ដើម្បីឆ្លើយតបទៅនឹងទីក្រុងវ៉ាស៊ីនតោន ដែលប្រើសិទ្ធិមនុស្សជាឧបករណ៍សម្រាប់ការឈ្លានពាន និងបង្កអរិភាព រួមទាំងអាកប្បកិរិយាប្រឆាំងនឹងកូរ៉េខាងជើង។
បេសកជនទទួលបន្ទុកបញ្ហាសិទ្ធិមនុស្សរបស់កូរ៉េខាងជើង លោកស្រី ជូលី ធើននើ (Julie Turner) បានទៅបំពេញទស្សនកិច្ចនៅទីក្រុងសេអ៊ូល និងតូក្យូកាលពីខែកុម្ភៈ ដើម្បីពិភាក្សាអំពីបញ្ហាសិទ្ធិមនុស្សនៅប្រទេសកូរ៉េខាងជើង ខណៈរបាយការណ៍ប្រចាំឆ្នាំនៅសប្តាហ៍នេះពីក្រសួងការបរទេសអាមេរិក បានពិពណ៌នាអំពី «បញ្ហាសិទ្ធិមនុស្សធ្ងន់ធ្ងរ» នៅក្នុងប្រទេសផ្ដាច់ខ្លួនមួយនេះ។
កូរ៉េខាងជើងក៏បានរិះគន់សហរដ្ឋអាមេរិក ចំពោះការជំរុញឱ្យខ្លួនបញ្ឈប់ការបាញ់មីស៊ីល និងរ៉ូកែតផ្សេងទៀត សម្រាប់អ្វីដែលទីក្រុងវ៉ាស៊ីនតោន ហៅថាជាការរំលោភលើសេចក្ដីសម្រេចរបស់អង្គការសហប្រជាជាតិ នេះបើតាមប្រព័ន្ធផ្សព្វផ្សាយ KCNA បានរាយការណ៍ដោយលើកឡើងពីការបាញ់បង្ហោះផ្កាយរណបរបស់កូរ៉េខាងត្បូង នៅក្នុងខែមេសានេះ៕