ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ សហការ​ជាមួយសហភាពសហព័ន្ធយុវជនកម្ពុជារាជធានីភ្នំពេញ និងទទួល​បានការ​គាំទ្រ​ដោយ​អង្គការ​អន្តរជាតិ​ខាងការងារ (ILO) នឹងរៀបចំពិព័រណ៍ការងារ និងមគ្គទេសន៍អាជីព រយៈពេ​ល​២​ថ្ងៃ​ជាប់​គ្នា គឺនៅថ្ងៃទី ៩-១០ ខែឧសភា ឆ្នាំ២០២៤ នៅទីតាំង អគារ KAMPUS ជិតស្ពាន​អាកាស​ក្បាល​ថ្នល់​។

ពិព័រណ៍នេះនឹងមានរៀបចំឲ្យយុវជន សិស្សនិស្សិត និង​អ្នកស្វែង​រកការងារធ្វើ បាន​ជួបផ្ទាល់​ជា​មួយ​ក្រុម​ហ៊ុនធំៗចំនួន ២០ ដែលនឹងផ្តល់ឱកាសការងារជាង ៥ពាន់កន្លែង។

ពិព័រណ៍ការងារ និងមគ្គទេសន៍អាជីព ឆ្នាំ២០២៤ នេះ រំពឹងថានឹងទាក់ទាញយុវជន សិស្ស/​និស្សិត និងអ្នកស្វែងរកការងារធ្វើ រាប់ពាន់នាក់មកចូលរួមទស្សនា ស្វែង​យល់​អំពី​ទីផ្សារ​ការងារ​នៅ​កម្ពុជា និងដាក់ពាក្យសម្ភាសការងារភ្លាមៗ​។ ជាមួយគ្នានេះ​អ្នកចូលរួមក៏អាច ស្វែង​យល់​អំពី​គន្លឹះ​សំខាន់ៗ​ក្នុងការដាក់ពាក្យស្វែងរកការងារ នៅក្នុងសិក្ខាសាលា​ចែក​រំលែក​ចំណេះ​ដឹង​ពីវាគ្មិន​ល្បី​ជាច្រើនផងដែរ៕