សមាគមអ្នកនាំចូល និងចែកចាយស្រាបៀរ និងបណ្តាក្រុមហ៊ុនសហគ្រាសផលិតគ្រឿងស្រវឹង នឹង​រួមគ្នា បង្កើនយុទ្ធនាការផ្សព្វផ្សាយទប់ស្កាត់ការបើកបរក្រោមឥទ្ធិពលគ្រឿងស្រវឹង និងគាំទ្រ​ចំណាត់​ការ​រាជរដ្ឋាភិបាល អាជ្ញាធរមានសមត្ថកិច្ច ដោះស្រាយ​បញ្ហា​ការ​ពិសារ​គ្រឿង​ស្រវឹង​ច្រើន​លើស​លប់ បង្កបញ្ហាដោយមិនមានការទទួលខុសត្រូវ។

តំណាងក្រុមហ៊ុនឧស្សហកម្មផលិតភេសជ្ជៈមានជាតិសុរា មកពីក្រុមហ៊ុន CAMBREW និង​ក្រុម​ហ៊ុន​ហ៊ែន​នីគែន ជាដើម បានថ្លែងថា ក្រុមហ៊ុននឹ​ង​បង្កើន​ការ​ផ្សាយ​ពាណិជ្ជ​កម្ម​តាម​ប្រព័ន្ធ​ផ្សព្វផ្សាយ និងធ្វើយុទ្ធនាការអប់រំ ពិសារគ្រឿងស្រវឹង ត្រូវមានការទទួលខុសត្រូវ និង ពិសារ​គ្រឿង​ស្រវឹង សូមកុំបើកបរ ជាដើមមិនលើកទឹកចិត្តឲ្យអ្នកប្រើប្រាស់នានា ពិសារ​គ្រឿង​ស្រវឹង​ដោយ​មិន​មានការទទួលខុសត្រូវ និងសូមគាំទ្រចំណាត់ការ ការដោះស្រាយរបស់រាជរដ្ឋាភិបាល ចំពោះ​អ្នកប្រើប្រាស់គ្រឿងស្រវឹងទាំងឡាយណា ដែលពិសាគ្រឿងស្រវឹងច្រើនលើសលប់ ដោយ​មិន​មាន​ការទំនួលខុសត្រូវ ។ 

លោក តាន់ សែឆាយ ប្រធានសមាគមអ្នកនាំចូល និងចែកចាយស្រាបៀរ និងស្រា WSBIDA បាន​ថ្លែង​ប្រាប់ BTV ថា បច្ចុប្បន្ន សមាគម បាន និងកំពុង​ធ្វើ​ការ​ជិត​ស្និត​ជា​មួយ​គណៈកម្មា​ធិការ​ជាតិ​សុវត្ថិភាពចរាចរណ៍ផ្លូវគោគ និងក្រសួងស្ថាប័នជំនាញនានា ធ្វើការអប់រំប្រជាពលរដ្ឋ និង​បណ្តា​អ្នក​បើកបរយានយន្តនានា យល់ដឹងអំពីបញ្ហាប៉ះពាល់គ្រឿងស្រវឹង និងបាន​ណែនាំ​ឲ្យ​បណ្តា​ក្រុម​ហ៊ុនសហគ្រាសភេសជ្ជៈមានជាតិសុរាដែលជាសមាជិក WSBIDA ផ្សព្វផ្សាយ​ពាណិជ្ជ​កម្ម​ភ្ជាប់​សារ​អប់រំដូចជា ពិសាគ្រឿងស្រវឹង កុំបើកបរ និងពិសាសុរា​ដោយ​ការ​ទទួល​ខុស​ត្រូវ​ជា​ដើម ដើម្បីការពារអាយុជីវិតខ្លួនឯងផង និងអ្នកដទៃផង។

តាមការឲ្យដឹងពីនគរបាលអគ្គស្នងការដ្ឋាននគរបាលជាតិ៖ ក្នុងអំឡុង​ពិធី​បុណ្យ​ចូល​ឆ្នំាថ្មី​ប្រពៃណី​ខ្មែរ ឆ្នាំរោង ឆ្នំា២០២៤ ដែលមានភ្ញៀវទេសចរជាតិអន្តរជាតិ ចេញដើរ​កម្សាន្ត​ប្រមាណ​ជាង​២១​ម៉ឺននាក់ក្នុងរយៈពេល៤ថ្ងៃ គឺករណីកើតមាន​គ្រោះថ្នាក់​ចរាចរណ៍​សរុប​មាន​ចំនួ​ន​៦៤​ករណី បង្កមនុស្សស្លាប់៣៧នាក់ និងរបួស៨៨រូប ហើយករណីចរាចរណ៍គ្រោះថ្នាក់ចរាចរណ៍ បង្ក​ដោយ កតា្តមិនផ្តល់សិទ្ធអាទិភាពមាន៤០% កតា្តល្បឿន៣៧%  កត្តាស្រវឹងបើកបរ ៧% និង​កត្តា​បើក​បរមិនប្រកាន់ស្តាំ៦%ជាដើម៕ អត្ថបទ ស៊ុម សុខជា