សិស្សសាលារាប់លាននាក់បានត្រឡប់ទៅសាលារៀន បន្ទាប់ពីបើក​ដំណើរ​ការ​ឡើង​វិញ​នៅ​ទូទាំង​ប្រទេស​បង់ក្លាដែស កាលពីថ្ងៃអាទិត្យ ទោះបីជារលកកម្ដៅខ្លាំងនៅតែបន្តអូសបន្លាយ ដែល​ជំរុញ​ឱ្យ​មាន​បញ្ជា​បិទថ្នាក់រៀនទូទាំងប្រទេសកាលពីចុងសប្តាហ៍មុនយ៉ាងណាក្ដី។

សីតុណ្ហភាព​អតិបរិមាជាមធ្យមក្នុងរដ្ឋធានី ដាកា (Dhaka) កាលពីសប្តាហ៍មុនគឺ ៤៤ទៅ៤៥ អង្សាសេ ខ្ពស់ជាងកម្រិតមធ្យមជាង៣០ឆ្នាំសម្រាប់រយៈពេលដូចគ្នានេះ ខណៈមាន​ការ​ព្យាករណ៍​ថា​អាកាសធាតុក្តៅនឹងបន្តកើតមានជាច្រើនថ្ងៃទៀត។

ការស្រាវជ្រាវ​ផ្នែកវិទ្យាសាស្ត្រ បានរកឃើញថាបម្រែប​ម្រួល​អាកាសធាតុ​កំពុង​បណ្តាល​ឱ្យ​មាន​រលក​កម្ដៅ​កាន់តែយូរ កាន់តែញឹកញាប់ និងកាន់តែខ្លាំង។

ថ្នាក់រៀនបាន​បន្ត ទន្ទឹមនឹងអាណាព្យាបាលព្រួយបារម្ភពីសុខភាពកូនចៅរបស់ពួកគេ ក្នុង​ពេល​ទៅ​សាលា​រៀន បន្ទាប់ពីការបើកថ្នាក់រៀនឡើងវិញនៅក្នុងប្រទេសបង់ក្លាដែស។

អង្គការ​ជួយសង្រ្គោះកុមារ (Save the Children) បាននិយាយ​នៅ​ក្នុង​សេច​ក្តីថ្លែង​ការណ៍​មួយ​នៅ​សប្តាហ៍​នេះថា សិស្សប្រហែល ៣២ លាននាក់ ត្រូវបានតម្រូវឲ្យស្នាក់នៅផ្ទះ ដោយសារ​ការ​បិទ​សាលា។

សេចក្តីណែនាំពីអាជ្ញាធរអប់រំដែលប្រកាសបើកថ្នាក់រៀនឡើងវិញបាននិយាយថា សាលា​មត្តេយ្យ​នឹង​នៅតែ​បិទ ខណៈកាត់បន្ថយម៉ោងសិក្សានៅថ្នាក់បឋមសិក្សា។

ការិយាល័យ​អាកាស​ធាតុ​របស់​ប្រទេសបង់ក្លាដែស​បាន​និយាយ​កាល​ពីថ្ងៃអាទិត្យ​ថា​រលក​កម្ដៅនឹ​ង​បន្ត​ហក់​ឡើងខ្ពស់យ៉ាងហោចណាស់បីថ្ងៃបន្ទាប់ទៀត៕