រដ្ឋមន្ត្រីការបរទេសអារ៉ាប៊ីសាអ៊ូឌីត កាលពីថ្ងៃអាទិត្យ (ទី២៨ ខែមេសា) បានសង្កត់ធ្ងន់លើតម្រូវការក្នុងការដោះស្រាយជម្លោះ «យ៉ាងដាច់ខាត» នៅតំបន់ហ្កាហ្សា ដោយលើកហេតុផលថា នេះនឹងជាផលប្រយោជន៍របស់មនុស្សគ្រប់គ្នា។ 

ព្រះអង្គម្ចាស់ Faisal bin Farhan Al Saud បានមានព្រះបន្ទូលបែបនេះនៅក្នុងសម័យប្រជុំស្តីពី «ការកសាងទំនុកចិត្តឡើងវិញ» នៅឯវេទិកាសេដ្ឋកិច្ចពិភពលោក (WEF) នាទីក្រុងរីយ៉ាដ។

ក្រៅតែពីការស្វែងរកដំណោះស្រាយ ក្នុងជម្លោះ នៅតំបន់ហ្កាហ្សា សម័យប្រជុំនេះក៏បានរួមបញ្ចូលផងដែរនូវសុន្ទរកថារបស់តំណាងជាន់ខ្ពស់សហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ គឺលោក Josep Borrell ដែលបានលើកឡើងពីសារៈសំខាន់នៃការបន្តការគាំទ្រលើអ៊ុយក្រែន ក្នុងសង្គ្រាមប្រឆាំងនឹងរុស្ស៊ី។

គួរដឹងផងដែរថា សម័យប្រជុំ WEF បានគូសបញ្ជាក់ពីភាពបន្ទាន់នៃការដោះស្រាយ ចំពោះជម្លោះ និងវិបត្តិដែលកំពុងបន្តមាន ដោយមេដឹកនាំ និងអ្នកចូលរួមបានសង្កត់ធ្ងន់លើសារៈសំខាន់នៃកិច្ចសហប្រតិបត្តិការអន្តរជាតិ ដើម្បីសម្រេចបាននូវសន្តិភាព និងស្ថិរភាពយូរអង្វែងនៅក្នុងតំបន់ដែលរងផលប៉ះពាល់ដោយជម្លោះ។

ហើយជាមួយគ្នានេះដែរ យោងតាមគេហទំព័ររបស់វេទិកានេះ បានឲ្យដឹងថា សម័យប្រជុំនេះបានជួបជុំមេដឹកនាំពិភពលោកជាង ១.០០០នាក់មកពីវិស័យ និងឧស្សាហកម្មផ្សេងៗ ក្នុងរយៈពេល ២ថ្ងៃ៕