មន្ត្រីទួរគី នៅថ្ងៃចន្ទ (ទី២៩ ខែមេសា) នេះ បាននិយាយថា ប្រទេសទួរគីបានប្រាប់សម្ព័ន្ធមិត្តថា ខ្លួននឹងគាំទ្របេក្ខភាពនាយករដ្ឋមន្ត្រីហូឡង់លោក Mark Rutte ធ្វើជាអគ្គលេខាធិការបន្ទាប់របស់អង្គការណាតូ (NATO) ដែលជាជំហានដ៏សំខាន់មួយឆ្ពោះទៅរកការធានាឲ្យរូបលោកបាននូវតួនាទីដ៏កំពូលនេះ។

ប្រធានបន្ទាប់របស់អង្គការណាតូនឹងជួបជាមួយបញ្ហាប្រឈមលើការគាំទ្ររបស់សម្ព័ន្ធមិត្ត សម្រាប់ការប្រយុទ្ធរបស់អ៊ុយក្រែនប្រឆាំងនឹងការលុកលុយរបស់រុស្ស៊ី ខណៈការពារប្រឆាំងនឹងការកើនឡើងដែលអាចទាញសម្ព័ន្ធមិត្តយោធាមួយនេះឲ្យធ្លាក់ចូលក្នុងសង្រ្គាមដោយផ្ទាល់ជាមួយទីក្រុងមូស្គូ។ អង្គការណាតូត្រូវធ្វើការសម្រេចដោយឯកច្ឆន្ទ ដូច្នេះ បេក្ខជនម្នាក់ៗត្រូវការការគាំទ្រពីសម្ព័ន្ធមិត្តទាំង ៣២ប្រទេស។

គួរបញ្ជាក់ថា នៅមុននេះ ទួរគី រួមជាមួយនឹងប្រទេសសមាជិកណាតូផ្សេងទៀត ដូចជាហុងគ្រី ស្លូវ៉ាគី និងរូម៉ានីដែលប្រធានាធិបតីរបស់ប្រទេសនេះ គឺលោក Klaud Iohannis កំពុងឈរឈ្មោះប្រជែងនឹងលោក Rutte មិនបានបង្ហាញជាសាធារណៈនូវការគាំទ្ររបស់ខ្លួន ដើម្បីឲ្យលោក Rutte ស្នងតំណែងលោក Jens Stoltenberg ដែលនឹងចុះចេញពីតួនាទីជាប្រមុខសម្ព័ន្ធភាពយោធានេះ នៅក្នុងខែតុលា។ .

តែយ៉ាងណាក្ដី ការព្រមគាំទ្ររបស់ទីក្រុង Ankara អាចបង្កើនសម្ពាធឲ្យលោក Iohannis ដកខ្លួនចេញពីការប្រកួត ទោះបីជាហុងគ្រីបានសម្តែងការប្រឆាំងទៅនឹងបេក្ខភាពរបស់លោក Rutte ក៏ដោយ។ 

ជាមួយគ្នានេះ សហរដ្ឋអាមេរិក បារាំង អាឡឺម៉ង់ អង់គ្លេស និងសមាជិកសម្ព័ន្ធមិត្តផ្សេងទៀត បានបង្ហាញរួចហើយនូវការគាំទ្រដល់បេក្ខភាពរបស់លោក Rutte។

ដោយដកស្រង់សម្តីអ្នកការទូតរបស់អង្គការណាតូ ទីភ្នាក់ងារសារព័ត៌មានហូឡង់ ANP បានឲ្យដឹងថា ប្រទេសទួរគីបានសម្រេចគាំទ្របេក្ខភាពរបស់លោក Rutte ប៉ុន្តែសារព័ត៌មាននេះមិនបានផ្តល់ព័ត៌មានលម្អិតបន្ថែមនោះទេ។ ចំណែកទីភ្នាក់ងារសារព័ត៌មានរដ្ឋ Anadolu របស់ទួរគី ក៏បានបញ្ជាក់ពីការគាំទ្ររបស់ទីក្រុង Ankara ផងដែរ៕