គិតមកដល់បច្ចុប្បន្ននេះ សមាគមសហគ្រិនស្រ្តីកម្ពុជា (CWEA) មានវ័យ ១២ឆ្នាំហើយ ដែល​បង្កើត​ឡើងដើម្បីលើកឡើងអំពីបញ្ហាទៅកាន់រដ្ឋាភិបាល អាជីវកម្ម សហគមន៍ មហាជន និង​ប្រព័ន្ធ​ផ្សព្វផ្សាយ ក្នុងគោលបំណងធ្វើឲ្យមជ្ឈដ្ឋាន អាជីវកម្មមានភាពល្អប្រសើរជាងមុន។

លោកជំទាវ ចាន់ ភារី ប្រធានសមាគមសហគ្រិនស្រ្តីកម្ពុជា នៅក្រោយកម្មវិធី​តំរង់ទិស​សមាជិកា​ថ្មី​២០២៤ និងជំនួបសហគ្រិនស្រ្តី កាលពីរសៀលថ្ងៃទី២៩ ខែមេសាកន្លងទៅ បានមាន​ប្រសាសន៍​ប្រាប់​ព័ត៌មាន ប៊ីធីវី ឲ្យដឹងថា មកដល់ពេលនេះសមាគមតែងតែជំរុញ និងលើកទឹកចិត្ត​ដល់​សហគ្រិន​ទាំង​អស់ ជាពិសេសមុខរបរទាំងឡាយដែលគ្រប់គ្រងដោយស្រ្តី គឺចង់ឃើញគាត់​មាន​ភាព​រីក​ចម្រើន ខណៈសមាគមកំពុងមានគម្រោង​ក្នុង​ការ​ពង្រីក​វិសាលភាព​ទៅ​ដល់​ក្រៅ​ប្រទេស​ថែម​ទៀត​។

លោកជំទាវ បានឲ្យដឹងទៀតថា គិតត្រឹមបំណាច់ឆ្នាំ២០២៣ សមាគមមាន​សមាជិក​សរុប​ចំនួន​ប្រមាណ ៨០០នាក់។ ដោយឡែក ទាក់ទិនគម្រោងក្នុងអាណិត្ត ដែលលោកជំទាវ​ទើប​ចូល​កាន់​តំណែង​ថ្មី​ៗ​នេះ លោកជំទាវបានបញ្ជាក់ថា ធ្វើយ៉ាងណា នឹងព្យាយាមរក្សាបាននូវសមាជិកចាស់ ហើយនឹងបង្កើតសមាជិកថ្មីឲ្យកាន់តែច្រើនថែមទៀត។ ហើយដើម្បី​ទទួ​ល​បាន​សមាជិក​ថ្មី​ច្រើន​ទៀត​នោះ គឺក្រុមការងារបានត្រៀមគណៈកម្មការច្រើនដែលជួយអភិវឌ្ឍន៍ទៅលើផ្នែកខាងក្នុង ដូចជាហេដ្ឋា​រចនារបស់សមាគម និងការគ្រប់គ្រងផ្ទៃក្នុងជាដើម ដើម្បីបម្រើនូវ​សេវា​កម្ម​ល្អ​ទៅ​ដល់​សមាជិក​នៃ​សមាគមសហគ្រិនស្រ្តីកម្ពុជា។

ក្នុងពិធីខាងលើនេះ លោកស្រី ឌុច លីនដា អគ្គលេខាធិការសហគ្រិនស្រ្តីកម្ពុជា បាន​បង្ហាញ​អារម្មណ៍​សប្បាយរីករាយ ដោយសារការមើលឃើញថា ស្រ្តីជាច្រើននៅក​ម្ពុជា​ទទួល​បាន​ការ​យក​ចិត្ត​ទុក​ដាក់ជាហូហែរ ក្នុងការជួយជំរុញអាជីវកម្ម, បង្កើតសាមគ្គីភាព ក៏ដូចជាការលើក​ទឹក​ចិត្ត​ជំរុញ​ភាព​អង់អាចក្លាហានក្នុងការអភិវឌ្ឍខ្លួនឱ្យក្លាយជាសហគ្រិនស្ត្រីដ៏រឹងមាំ ដើម្បីលើកស្ទួយ​សេដ្ឋកិច្ច​គ្រួសារ និង​សេដ្ឋកិច្ចជាតិ និងបង្កើនសមត្ថភាពសហគ្រិន​ស្ត្រីឱ្យមាន​ចំណេះ​ដឹង​ផ្នែក​ហិរញ្ញ​វត្ថុ​។

សូមបញ្ជាក់ថា លក្ខខណ្ឌដើម្បីអាចក្លាយជាសមាជិកសមាគមសហគ្រិនស្ត្រីកម្ពុជាបាន ស្ត្រី​ត្រូវ​មាន​មុខរបរ អាជីវកម្ម ឬស្ត្រីដែលមានតួនាទីមុខងារ មុខតំណែង នៅក្នុងស្ថាប័នឯកជន។ ចំពោះ​អត្ថ​ប្រយោជន៍ សមាជិកទាំងអស់អាចបង្កើតទំនាក់ទំនងបណ្តាញក្នុងការប្រកបអាជីវកម្ម មិន​ថា​ខ្នាត​តូច មធ្យម ឬធំនោះទេ។ ក្រៅពីទំនាក់ទំនងអាជីវកម្ម ក៏ទទួល​បាន​ការ​បណ្តុះ​បណ្តាល​ពី​ជំនាញ​ការ​គ្រប់គ្រងអាជីវកម្មផងដែរ៕​ អត្ថបទ៖ ឈិត បូរ៉ាវី