អ្នកស្រុករាប់រយនាក់របស់កោះ Ruang នៅខេត្ត Sulawesi ខាងជើងរបស់ប្រទេសឥណ្ឌូនេស៊ី នឹងត្រូវផ្លាស់ទីលំនៅ បន្ទាប់ពីមានការផ្ទុះដ៏ធំនៃភ្នំភ្លើង Ruang ចាប់តាំងពីថ្ងៃទី១៦ ខែមេសា។ ហើយបណ្ដាអ្នកជំនាញ និយាយថា គ្រប់ផ្នែកទាំងអស់នៃកោះ ឥឡូវនេះអាចងាយរងគ្រោះ ប្រសិនបើការផ្ទុះកើតឡើងម្តងទៀត។

នៅលើកោះ Ruang ភូមិចំនួន២ ដែលមាន ២៧២គ្រួសារ ឬប្រជាជនប្រហែល ៨៣៨នាក់ នឹងត្រូវផ្លាស់ចេញពីតំបន់ដាច់ស្រយាលនៅលើកោះដែលមានផ្ទៃក្រឡា ១៩គីឡូម៉ែត្រការ៉េ ក្នុងសមុទ្រ Sulawesi នេះ។

អនុប្រធានផ្នែកស្តារ និងកសាងឡើងវិញនៃទីភ្នាក់ងារជាតិគ្រប់គ្រងគ្រោះមហន្តរាយ (BNPB) គឺលោក Jarwansyah កាលពីថ្ងៃចន្ទ (ទី២៩ ខែមេសា) បាននិយាយថា «ឥឡូវនេះពួកគេកំពុងត្រូវបានជម្លៀសចេញ ហើយនឹងត្រូវផ្លាស់ទីកន្លែងឆាប់ៗនេះ»។ លោកបានបន្ថែមថា ក្រសួងសាធារណការ និងលំនៅឋាន កំពុងរៀបចំ សម្រាប់ប្រជាពលរដ្ឋនៅកោះ Ruang ដែលត្រូវផ្លាស់ប្តូរទីលំនៅទៅកាន់កោះក្បែរនោះ គឺកោះ Tagulandang ដែលមានចម្ងាយប្រហែល ៥គីឡូម៉ែត្រ។

គួរបញ្ជាក់ថា ការផ្ទុះជាបន្តបន្ទាប់ដែលអ្នកជំនាញពណ៌នាថា ជាការផ្ទុះធំជាងគេបំផុត ក្នុងរយៈពេល ៥០ឆ្នាំរបស់ឥណ្ឌូនេស៊ី បានកើតឡើងនៅភ្នំ Ruang ចាប់តាំងពីថ្ងៃទី១៦ ខែមេសាមក។ ក្រុមអ្នកជំនាញបានសរសើរការត្រៀមខ្លួនរបស់អ្នកស្រុកកោះ Ruang ដែលអាចជម្លៀសខ្លួនចេញក្នុងរយៈពេលប៉ុន្មានម៉ោង មុនពេលការផ្ទុះបានកើតឡើង។ ហើយមិនមានអ្នករងគ្រោះត្រូវបានរាយការណ៍បន្ទាប់ពីមានការផ្ទុះនោះ។

មជ្ឈមណ្ឌលកាត់បន្ថយគ្រោះមហន្តរាយភ្នំភ្លើង និងភូគព្ភសាស្ត្រឥណ្ឌូនេស៊ី (PVMBG) បានទម្លាក់ស្ថានភាពភ្នំភ្លើងពីកម្រិតប្រកាសអាសន្ន IV (លេខ៤) ដល់កម្រិត III (លេខ៣) ។ តែទោះជាយ៉ាងណាក្ដី សាធារណជននៅតែត្រូវបានហាមឃាត់មិនឲ្យធ្វើដំណើរលើកោះនោះ។

យោងតាមអ្នកជំនាញ បានឲ្យដឹងថា គ្រប់ផ្នែកទាំងអស់នៃកោះ Ruang ឥឡូវនេះត្រូវបានចាត់ទុកថា ងាយរងគ្រោះដោយលំហូរកម្អែភ្នំភ្លើង និងសំណុំឧស្ម័នដែលមានចលនាផ្លាស់ទីលឿន ក៏ដូចជាវត្ថុធាតុភ្នំភ្លើងផ្សេងទៀត ដែលធ្វើឲ្យការផ្លាស់ប្តូរទីកន្លែង គឺជាជម្រើសដ៏ល្អបំផុត សម្រាប់សហគមន៍ដែលរងផលប៉ះពាល់៕