​បាល់ទាត់៖ ខ្សែ​ការពារ​កណ្តាល​សញ្ជាតិ​ហូ​ឡង់ Virjil van Dijk បាន​វិល​ចូល​លេង​វិញ​ជា​លើកដំបូង​ឱ្យ Liverpool ក្រោយ​អវត្តមាន ៩ខែ​ដោយសារ​របួស​តែ Liverpool ចាញ់ Hertha Berlin ៤-៣ ការប្រកួត​មិត្តភាព​កំដៅ​សាច់ដុំ​ត្រៀម​រដូវ​កាល​ថ្មី​។

​​ក្រុម​មកពី Premier League ជា​អ្នក​ចាប់ផ្តើម​បានល្អ​ជាង តែ​ក្រោយមក​ត្រូវបាន Hertha Berlin នាំមុខ​មុន​ពីរ​គ្រាប់​ដោយ Santiago Ascacibar និង Suat Serda ត្រឹម​នាទី​ទី៣១ មុនពេល​ដែល Sadio Mane តប​បាន​មួយ​គ្រាប់​នៅ​នាទី​ទី៣៧ និង Minamino តាម​ស្មើ​នៅ​នាទី​ទី៤៣​។ ចូល​វគ្គ​ទី២ Hertha Berlin នាំមុខ​ ២​គ្រាប់​ម្តងទៀត​ដោយ​ ២​គ្រាប់​របស់​អតីត​ខ្សែប្រយុទ្ធ Manchester City, Stevan Jovetic ខណៈ Alex-Oxlade Chamberlain តប​បាន​មួយ​គ្រាប់​វិញ​មុន​ចប់​ការប្រកួត​។ ​​ក្រៅពី Virjil van Dijk ដែលជា​ពីរ​បួស​ត្រលប់មក​ទីលាន​វិញ​នោះ ខ្សែការពារ​អង់គ្លេស Joe Gomez ក៏​ត្រលប់​មកវិញ​ដែរ ក្រោយ​អវត្តមាន ៨ខែ​ដោយសារ​របួស​ជង្គង់​ជាមួយ​ក្រុម​ជំរើសជាតិ​អង់គ្លេស​តាំងពី​ខែវិច្ឆិកា​។

​​ចំណែក​កីឡាករ​ហូ​ឡង់ Virjil van Dijk បាន​រងរបួស​ជើង​ដែល​ឈានដល់​ការវះកាត់ ​ក្រោយ​ប៉ះទង្គិច​ជាមួយ​អ្នកចាំទី Everton, Jordan Pickford តាំងពី​ខែតុលា​។​ ​​Liverpool នៅមាន​ការប្រកួត​មិត្តភាព​បន្តទៀត​ដោយ​ជួប​ជាមួយ Bologna, Athletic Bilbao និង Osasuna មុន​បើក​រដូវ​កាល English Premier League ជួប​ជាមួយ Norwich City នៅ​ថ្ងៃទី១៤ ខែសីហា​៕

​អត្ថបទ​៖​នាង សុភា​វុ​ធ