នគរបាលទួរគី នៅថ្ងៃពុធ (ទី១ ខែឧសភា) នេះ បានចាប់ឃុំខ្លួនបាតុកររាប់សិបនាក់ដែលប៉ុនប៉ងរុះរើរបាំងនៅក្នុងតំបន់ផ្សេងៗគ្នានៃទីក្រុងអ៊ីស្តង់ប៊ុល បន្ទាប់ពីអាជ្ញាធរបានហាមឃាត់មិនឲ្យប្រមូលផ្តុំគ្នា នៅឯទីលានដ៏សំខាន់របស់ទីក្រុង គឺទីលាន Taksim ក្នុងថ្ងៃប្រារព្ធទិវាពលកម្មអន្តរជាតិ។

នគរបាលរាប់ម៉ឺននាក់ត្រូវបានដាក់ពង្រាយនៅទូទាំងទីក្រុងអ៊ីស្តង់ប៊ុល ដោយបានបិទសូម្បីតែផ្លូវតូចៗជាមួយនឹងរបាំងដែក ដែលជាការប៉ុនប៉ងរារាំងដល់ក្រុមបាតុករកុំឲ្យមានការប្រមូលផ្តុំ។ គួរបញ្ជាក់ថា អាជ្ញាធរបានហាមឃាត់ការប្រមូលផ្តុំគ្នា នៅទីលាន Taksim ចាប់តាំងពីមានបាតុកម្មឆ្នាំ២០១៣ ប្រឆាំងនឹងរដ្ឋាភិបាលរបស់ប្រធានាធិបតីលោក Recep Tayyip Erdogan។

អ្នកសារព័ត៌មានរបស់ទីភ្នាក់ងារសារព័ត៌មាន AFP នៅកន្លែងកើតហេតុ បានរាយការណ៍ថា នៅតំបន់ Besiktas នគរបាលបានឃុំខ្លួនបាតុករឆ្វេងនិយមយ៉ាងតិច ៣០នាក់ ដែលស្រែកថា «ទីលាន Taksim មិនអាចត្រូវបានហាមឃាត់ទេ»។ អ្នកតវ៉ាម្នាក់ត្រូវបាននគរបាលអូសតាមដី ហើយក្រុមរបស់អ្នកតវ៉ារូបនោះត្រូវបានចាប់ខ្លួន។ មនុស្ស ៣០នាក់ផ្សេងទៀត ត្រូវបានឃុំខ្លួន នៅក្នុងតំបន់ Sisli។

ផ្លូវសំខាន់ៗនៅទូទាំងទីក្រុងអ៊ីស្តង់ប៊ុល ត្រូវបានបិទមិនឲ្យចរាចរ ខណៈដែលការដឹកជញ្ជូនសាធារណៈ ក្នុងនោះរួមទាំងតាមសាឡាង និងរថភ្លើងក្រោមដី ក៏ត្រូវបានផ្អាកផងដែរ៕