ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» នៃក្រសួងពាណិជ្ជកម្ម បានសហការជាមួយអាជ្ញាធរជាតិប្រយុទ្ធប្រឆាំងគ្រឿងញៀន រៀបចំ​ធ្វើ​ការតេស្តទឹកមូត្ររកសារធាតុញៀន ចំពោះថ្នាក់ដឹកនាំ មន្រ្តីរាជការ និង​បុគ្គលិក​ក្រៅ​ក្រប​ខណ្ឌ​សរុប​ចំនួនប្រមាណ ៦០០នាក់។

ប្រភពអគ្គនាយកដ្ឋាន ក.ប.ប. នៅថ្ងៃទី២ ខែឧសភា ឆ្នាំ២០២៤នេះ បានឲ្យដឹងថា ដោយ​អនុវត្ត​នូវ​បទ​បញ្ជារបស់រាជរដ្ឋាភិបាលកម្ពុជា ស្ដីពីការដាក់ចេញ​វិធានការ​ម៉ឺងម៉ាត់​ក្នុង​ការ​ប្រយុទ្ធ​ប្រឆាំង​គ្រឿង​ញៀន​ខុសច្បាប់នៅតាមក្រសួង ស្ថាប័ន និងរដ្ឋបាលថ្នាក់ក្រោមជាតិ និងសេចក្ដី​ណែនាំ​លេខ​ ០០១ សណន.អ.ជ.ប.គ.ញ. របស់អាជ្ញាធរជាតិប្រយុទ្ធប្រឆាំងគ្រឿងញៀន ស្ដីពី​វិធានការ​ក្នុង​ការចាត់តាំងអនុវត្តបទបញ្ជារបស់រាជរដ្ឋាភិបាលលេខ០១ បប អគ្គនាយកដ្ឋាន ក.ប.ប. បាន​រៀបចំ​ធ្វើ​ការតេស្តទឹកមូត្ររកសារធាតុញៀននេះ។

ប្រភពដដែល បានបញ្ជាក់ថា ជាលទ្ធផល បន្ទាប់ពីបានធ្វើតេស្តទឹកមូត្ររកសារធាតុញៀន ចំពោះ​ថ្នាក់​ដឹកនាំ មន្រ្តីរាជការ និងបុគ្គលិកក្រៅក្របខណ្ឌ នៃអគ្គនាយកដ្ឋាន ក.ប.ប. ជាលទ្ធផល គឺ​អវិជ្ជមាន​ទាំងអស់។ ការធ្វើតេស្តនេះ គឺអនុវត្តតាម SOP របស់អាជ្ញាធរជាតិ​ប្រយុទ្ធ​ប្រឆាំង​គ្រឿង​ញៀន​ និងបង្កើតគណៈកម្មការ អនុគណៈកម្មការ ដោយ​មាន​សមាសភាព​មក​ពី​តំណាង​អាជ្ញាធរ​ជាតិ​ប្រយុទ្ធ​ប្រឆាំងគ្រឿងញៀនផងដែរ។

ក.ប.ប. បានបន្ថែមថា ការធ្វើនេះ គឺដើម្បីកំណត់បាននូវតម្លាភាព និងអព្យាក្រឹត្យភាព ដល់ថ្នាក់​ដឹក​នាំមន្រ្តីរាជការ និងមន្រ្តីជាប់កិច្ចសន្យាទាំងអស់៕