​ចិន៖ ប្រទេស​ចិន​កាលពី​ថ្ងៃ​ព្រហស្បតិ៍​ម្សិលមិញ​ បាន​រិះគន់​ជំនួប​រវាង​រដ្ឋមន្ត្រីការបរទេស​អាមេរិក​ លោក Antony Blinken ជាមួយ​តំណាង​មេដឹកនាំ​និរទេស​ទី​បេសង្ឃដា​ឡៃ​ឡា​ម៉ា (Dalai Lama) អំឡុង​ដំណើរ​របស់​លោក​ទៅកាន់​ប្រទេស​ឥណ្ឌា​។​

​អ្នកនាំពាក្យ​ក្រសួងការបរទេស​អាមេរិក​បាន​និយាយ​ថា ​លោក Blinken បាន​ជួប​ជាមួយ​លោក Ngodup Dongchung តំណាង​រដ្ឋបាល​កណ្តាល​ទី​បេ (CTA) ដែល​ត្រូវ​បាន​គេ​ស្គាល់​ថា ​ជា​រដ្ឋាភិបាល​ទី​បេ​ដែល​និរទេស​ខ្លួន​នៅ​ក្នុង​ទីក្រុង​ញូ​វ​ដេលី​។​ អ្នកនាំពាក្យ​ក្រសួងការបរទេស​ចិន​លោក Zhao Lijian បាន​ប្រាប់​សន្និសីទ​សារព័ត៌មាន​ប្រចាំ​ថ្ងៃមួយ​ថា ​“ប្រទេស​ចិន​ប្រឆាំង​ដាច់​ខាត ​ចំពោះ​ទម្រង់​នៃ​ទំនាក់​ទំនង​ណាមួយ​រវាង​មន្ត្រី​ប្រទេស​ណាមួយ​ និង​សម្ដេច​សង្ឃ​ដា​ឡៃ​ឡា​ម៉ា​”។​ លោក​បាន​ទទូច​ថា ​កិច្ចប្រជុំ​នេះ​បាន​រំលោភ​លើ​ការ​ប្តេជ្ញាចិត្ត​របស់​សហ​រដ្ឋ​អាមេរិក ក្នុង​ការ​ទទួលស្គាល់​ទី​បេ​ជា​ផ្នែក​មួយ​របស់​ប្រទេស​ចិន និង​បាន​ជំ​រុញ​ឱ្យ​បញ្ឈប់​ការ​ជ្រៀត​ជ្រែក​ចូល​កិច្ចការ​ផ្ទៃក្នុង​របស់​ចិន​ជាមួយ​បញ្ហា​ទី​បេ​ និង​គាំទ្រ​កងកម្លាំង​ឯករាជ្យ​ទី​បេ​។​

រដ្ឋាភិបាល​ក្រុង​ប៉េកាំង​មិន​ទទួលស្គាល់​រដ្ឋាភិបាល​និរទេស​ទី​បេ​ ហើយ​មិនបាន​ជួបពិភាក្សា​ជាមួយ​តំណាង​សម្ដេច​សង្ឃ​ដា​ឡៃ​ឡា​ម៉ា ​ចាប់​តាំង​ពី​ឆ្នាំ​២០១០ មក​។​ ទីក្រុង​ប៉េកាំង​ចោទប្រកាន់​មេដឹកនាំ​ព្រះពុទ្ធសាសនា​អង្គ​នេះ​ថា ​បាន​ព្យាយាម​បំបែក​តំបន់​ទី​បេ​ចេញពី​ប្រទេស​ចិន​ ដែល​សង្ឃ​ដា​ឡៃ​ឡា​ម៉ា​បដិសេធ​៕

អត្ថបទ៖ សុខមាន