ប្រធានាធិបតីវេណេហ្ស៊ុយអេឡា លោក Nicolas Maduro កាលពីថ្ងៃពុធ (ទី១ ខែឧសភា) បាននិយាយថា បុគ្គលិកសាធារណៈ នៅវេណេហ្ស៊ុយអេឡា នឹងទទួលបានប្រាក់រង្វាន់ចំនួន ១៣០ដុល្លារ ក្នុង ១ខែ ដោយការលើកឡើងនេះ កើតមានចំពេលមានការទាមទារពីសំណាក់ពួកកម្មករសុំឲ្យដំឡើងប្រាក់បៀវត្សរ៍ និងប៉ុន្មានខែ នៅមុនការបោះឆ្នោតប្រធានាធិបតី ដែលលោក Maduro កំពុងស្វែងរកការឈ្នះអាណត្តិទី៣។

លោក Maduro បានផ្តល់ព័ត៌មានលម្អិតតិចតួច នៅក្នុងការប្រកាសរបស់លោក ប៉ុន្តែសមាជិកសភាគណបក្សកាន់អំណាច លោក Francisco Torrealba ក្រោយមកបានឲ្យដឹងនៅលើបណ្តាញសង្គមថា ប្រាក់រង្វាន់នឹងត្រូវបានបង់ជារូបិយប័ណ្ណក្នុងស្រុក គឺបូលីវ៉ារ៍ ដែលស្មើនឹងចំនួនកំណត់ជាដុល្លារអាមេរិក។ លោក Torrealba បានប្រាប់តាមរយៈបណ្ដាញសង្គម X ថា កម្មករនឹងទទួលបានប្រាក់ ៩០ដុល្លារ ដែលជា «ប្រាក់រង្វាន់ទប់ទល់នឹងវិបត្តិសេដ្ឋកិច្ច» និងចំនួន ៤០ដុល្លារទៀត សម្រាប់ថ្លៃម្ហូបអាហារ។

គួរបញ្ជាក់ថា ការដំឡើងប្រាក់ឈ្នួល នៅក្នុងប្រទេសវេណេហ្ស៊ុយអេឡា មិនបានធ្វើឡើងឲ្យទាន់នឹងល្បឿននៃការកើនឡើងអតិផរណាប្រចាំឆ្នាំ ២ខ្ទង់ និង ៣ខ្ទង់ដែលបានកត់ត្រាកាលពីឆ្នាំមុននោះឡើយ។ តម្លៃទំនិញប្រើប្រាស់ បានហក់ឡើង ៦៧,៧៥ភាគរយ ធៀបនឹងឆ្នាំមុន រហូតដល់ខែមីនា។

ប្រាក់ឈ្នួលអប្បបរមាប្រចាំខែចំនួន ១៣០បូលីវ៉ារ៍ ស្មើនឹង ៣,៥ដុល្លារ ក្នុងអត្រាផ្លូវការ មិនត្រូវបានកែសម្រួលនោះឡើយ ចាប់តាំងពីខែមីនា ឆ្នាំ២០២២ ប៉ុន្តែរដ្ឋាភិបាលបានទូទាត់ប្រាក់រង្វាន់ដល់បុគ្គលិកផ្នែកសាធារណៈ និងអ្នកចូលនិវត្តន៍។ ប្រាក់រង្វាន់ចុងក្រោយត្រូវបានដំឡើងដល់ ១០០ដុល្លារ ក្នុងខែកុម្ភៈ៕