ភ្នំពេញ ៖ ក្រសួងសុខាភិបាល រសៀលថ្ងៃទី៣០ ខែកក្កដា ឆ្នាំ២០២១នេះ បានរៀបចំពិធីប្រគល់-ទទួល​ជំនួយទីភ្នាក់ងារសហប្រតិបត្តិការ​អន្តរជាតិប្រទេសថៃ ដើម្បីប្រើប្រាស់ក្នុងការការពារ ទប់ស្កាត់ និងឆ្លើយតបការរាតត្បាតជំងឺកូវីដ-19 នៅកម្ពុជា។

​ពិធីប្រគល់-ទទួលនេះ ធ្វើឡើងក្រោមវត្តមានឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល ជាមួយឯកឧត្តម Panyarak Poolthup ឯកអគ្គរាជទូតវិសាមញ្ញ និងពេញសមត្ថភាព នៃព្រះរាជាណាចក្រថៃ ប្រចាំព្រះរាជាណាចក្រកម្ពុជា។ សម្ភារៈបរិក្ខារវេជ្ជសាស្រ្តដែលប្រគល់ជូននាពេលនេះ រួមមាន: ម៉ាស៊ីនធ្វើតេស្តរកកូវីដ-19 (PCR Machine) ចំនួន០១គ្រឿង រួមទាំងគ្រឿងបន្ទាប់បន្សំ និងសម្លៀកបំពាក់សុវត្ថិភាពសម្រាប់មន្រ្តីសុខាភិបាល (PPE) ចំនួន១២០០កំផ្លេ។ ឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល បានគូសបញ្ជាក់ពីទឹកចិត្តសប្បុរសធម៌ដ៏ថ្លៃថ្លារបស់រាជរដ្ឋាភិបាល និងប្រជាជនថៃ ត្រូវបានចងចាំទុកដោយរាជរដ្ឋាភិបាលកម្ពុជា និងមន្រ្តីសុខាភិបាលព្រមទាំងអ្នករងគ្រោះដោយជំងឺកូវីដ-១៩។

រដ្ឋមន្ត្រីក្រសួងសុខាភិបាល ឯកឧត្តម សាស្រ្តាចារ្យ ម៉ម ប៊ុនហេង ក៏បានថ្លែងអំណរគុណយ៉ាងជ្រាលជ្រៅចំពោះជំនួយមនុស្សធម៌ដ៏ថ្លៃថ្លា របស់ទីភ្នាក់ងារសហប្រតិបត្តិការអន្តរជាតិប្រទេសថៃ គឺជាកាយវិការ នៃវប្បធម៌ចែករំលែកជាមួយរាជរដ្ឋាភិបាល និងប្រជាជនកម្ពុជា ជាពិសេសក្នុងកាលៈទេសៈបច្ចុប្បន្ន ដែលយើងបាននឹងកំពុងខិតខំប្រឹងប្រែងរួមគ្នា ដើម្បីជំរុញវិធានការការពារ ទប់ស្កាត់ និងឆ្លើយតបការរាលដាលនៃជំងឺកូវីដ-១៩ ឱ្យបានកាន់តែឆាប់រហ័ស។

 នៅរសៀលថ្ងៃដដែរ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានទទួលម៉ាស់ ចំនួន០១លានម៉ាស់ ពីឯកឧត្តម Richmond GUAN ទីប្រឹក្សាពិសេសនៃអគ្គកុងស៊ុល សាធារណរដ្ឋកោះម៉ាស្សាល់  ដើម្បីប្រើប្រាស់ក្នុងការការពារទប់ស្កាត់ និងឆ្លើយតបការរាលត្បាតជំងឺកូវីដ-១៩នៅកម្ពុជាផងដែរ៕អត្ថបទ ៖ រដ្ឋា