ប្រធានាធិបតីអ៊ុយក្រែនលោក Volodymyr Zelensky និយាយថា រុស្ស៊ីកំពុងទាញយកផលចំណេញពីការបញ្ជូនអាវុធយឺតយ៉ាវរបស់លោកខាងលិច ដើម្បីបន្តការវាយប្រហារ ដោយការអត្ថាធិប្បាយរបស់លោកបែបនេះ កើតមានឡើងបន្ទាប់ពីសហរដ្ឋអាមេរិកបានយល់ព្រមផ្ដល់កញ្ចប់ថវិកាចំនួន ៦១ពាន់លានដុល្លារ ដែលភាគច្រើនជាជំនួយយោធា សម្រាប់អ៊ុយក្រែន។

លោក Zelensky បាននិយាយថា ជំនួយមួយចំនួនបានចាប់ផ្តើមមកដល់ហើយ ប៉ុន្តែបានបន្ថែមថា ចាំបាច់ត្រូវបញ្ជូនឲ្យបានលឿនជាងនេះ។ នេះជាអ្វីដែលលោកបានលើកឡើង អំឡុងមានជំនួបជាមួយប្រមុខអង្គការណាតូ លោក Jens Stoltenberg ដែលបាននិយាយថា វាមិនយឺតពេលនោះទេ សម្រាប់អ៊ុយក្រែនក្នុងការយកឈ្នះ ក្នុងសង្គ្រាមទល់នឹងរុស្ស៊ី ទោះពេលនេះចាញ់ប្រៀបក្ដី។

ហើយការលើកឡើងរបស់លោកប្រធានាធិបតីរូបនេះ ក៏កើតឡើងផងដែរបន្ទាប់ពីអាជ្ញាធរ នៅទីក្រុងកំពង់ផែសមុទ្រខ្មៅ Odesa បាននិយាយថា ការវាយប្រហារដោយមីស៊ីលរបស់រុស្ស៊ី បានសម្លាប់មនុស្សយ៉ាងហោចណាស់ ៤នាក់ និងបណ្ដាលឲ្យរងរបួស ៣២នាក់ ។

នៅឯសន្និសីទសារព័ត៌មានរួមគ្នាជាមួយលោក Stoltenberg ក្នុងទីក្រុងគីវ លោក Zelensky បាននិយាយថា៖ «ឥឡូវនេះ កងទ័ពរុស្ស៊ីកំពុងព្យាយាមទាញយកផលចំណេញពីស្ថានភាព ដែលយើងកំពុងរង់ចាំការផ្គត់ផ្គង់ពីដៃគូរបស់យើង ជាពិសេសពីសហរដ្ឋអាមេរិក។ ហើយនោះហើយជាមូលហេតុដែលល្បឿននៃការបញ្ជូនអាវុធ មានន័យស្មើនឹងធ្វើសមរភូមិមុខមានស្ថេរភាព»។

ជាមួយគ្នានេះដែរ លោកបានបញ្ជាក់ជាពិសេសពីតម្រូវការរបស់អ៊ុយក្រែន សម្រាប់គ្រាប់កាំភ្លើងធំ និងប្រព័ន្ធការពារដែនអាកាស។

គួរបញ្ជាក់ថា កងកម្លាំងអ៊ុយក្រែនបានទទួលរងផលប៉ះពាល់ពីកង្វះខាតគ្រាប់រំសេវ និងប្រព័ន្ធការពារដែនអាកាស ក្នុងរយៈពេលប៉ុន្មានខែថ្មីៗនេះ។ ហើយក្រុមមន្ត្រីបានស្តីបន្ទោសការយឺតយ៉ាវ ក្នុងការផ្ដល់ជំនួយយោធាពីសហរដ្ឋអាមេរិក និងសម្ព័ន្ធមិត្តលោកខាងលិចផ្សេងទៀតថា បានធ្វើឲ្យមានការបាត់បង់ជីវិត និងដែនដី៕