មនុស្សរាប់រយនាក់ ដែលកំពុងតវ៉ាសង្គ្រាមអ៊ីស្រាអែលនៅតំបន់ហ្កាហ្សា បានមកប្រមូលផ្តុំគ្នានៅសាកលវិទ្យាល័យមួយរបស់ប្រទេសអូស្ត្រាលី កាលពីថ្ងៃសុក្រ ដោយទាមទារឱ្យសាកលវិទ្យាល័យ ដកខ្លួនចេញពីក្រុមហ៊ុនដែលមានទំនាក់ទំនងជាមួយអ៊ីស្រាអែល នៅក្នុងចលនាមួយត្រូវបានបំផុសគំនិតដោយនិស្សិតកំពុងចូលកាន់កាប់សាកលវិទ្យាល័យនានានៅសហរដ្ឋអាមេរិក។

សកម្មជនគាំទ្រប៉ាឡេស្ទីន បានបង្កើតជំរំ កាលពីសប្តាហ៍មុន នៅសាកលវិទ្យាល័យស៊ីដនី ជាស្ថាប័នឧត្តមសិក្សាធំបំផុតមួយរបស់ប្រទេសអូស្ត្រាលី។ ជំរំស្រដៀងគ្នានេះ ក៏ត្រូវបានបង្កើតឡើងនៅសាកលវិទ្យាល័យក្នុងទីក្រុង Melbourne ទីក្រុងCanberra និងទីក្រុងផ្សេងទៀតរបស់អូស្ត្រាលី។

មិនដូចនៅសហរដ្ឋអាមេរិកនោះទេ ដែលនគរបាលបានបណ្តេញក្រុមបាតុករគាំទ្រប៉ាឡេស្ទីនដោយបង្ខំជាច្រើននាក់នៅមហាវិទ្យាល័យមួយចំនួន ទីតាំងតវ៉ានៅក្នុងប្រទេសអូស្ត្រាលីធ្វើឡើងដោយសន្តិវិធី ដោយមានវត្តមាននគរបាលតិចតួច។ កាលពីថ្ងៃសុក្រ ក្រុមអ្នកតវ៉ា បានប្រមូលផ្តុំគ្នាដើម្បីទាមទារឱ្យសាកលវិទ្យាល័យស៊ីដនី ដកខ្លួនចេញពីក្រុមហ៊ុនដែលមានទំនាក់ទំនងជាមួយអ៊ីស្រាអែល ដោយគាំទ្រការអំពាវនាវពីនិស្សិតនៅសហរដ្ឋអាមេរិក កាណាដា និងនៅប្រទេសបារាំង។

ដោយឈរនៅក្នុងហ្វូងមនុស្សជាង ៣០០នាក់ ជាមួយនឹងកូនប្រុសអាយុ២ឆ្នាំនៅលើស្មា លោក Matt អាយុ៣៩ឆ្នាំ បាននិយាយថា លោកមកនេះគឺដើម្បីបង្ហាញថា វាមិនមែនត្រឹមតែនិស្សិតនោះទេដែលមានកំហឹងចំពោះសកម្មភាពរបស់អ៊ីស្រាអែលនៅតំបន់ហ្កាហ្សា។ លោកនិយាយថា នៅពេលដែលអ្នកយល់ពីអ្វីដែលកំពុងកើតឡើង អ្នកមានទំនួលខុសត្រូវក្នុងការព្យាយាមចូលរួម និងបង្កើនការយល់ដឹង និងបង្ហាញពីសាមគ្គីភាព។

សាកលវិទ្យាធិការរងនៃសាកលវិទ្យាល័យស៊ីដនី លោក Mark Scott បានប្រាប់ប្រព័ន្ធផ្សព្វផ្សាយក្នុងស្រុកកាលពីថ្ងៃព្រហស្បតិ៍ថា ការបោះជំរំគាំទ្រប៉ាឡេស្ទីន អាចដាក់នៅក្នុងបរិវេណសាកលវិទ្យាមួយផ្នែក ដោយសារតែពុំមានអំពើហិង្សា ដូចដែលបានឃើញនៅក្នុងសហរដ្ឋអាមេរិកនោះទេ។