កាលពីថ្ងៃទី៥ ដល់ថ្ងៃទី១៧ ខែឧសភា ឆ្នាំ២០២៣ គឺជាព្រឹត្តិការណ៍​មហា​ជោគជ័យ​ជា​ប្រវត្តិសាស្ត្រ ដែលកម្ពុជាបានធ្វើជាម្ចាស់ផ្ទះរៀបចំប្រកួតកីឡាស៊ីហ្គេមលើកទី៣២ ជាលើក​ដំបូង​ឡើង​វិញ ក្រោយកម្ពុជា អាក់ខានរៀបចំចំនួន៦៤ឆ្នាំ។ ក្នុងឱកាសខួប១ឆ្នាំនៃការរៀបចំព្រឹត្តិការណ៍ដ៏អស្ចារ្យនេះ ក្រុមអត្តពលិក និងពលរដ្ឋ បាន​បង្ហាញ​ការ​នឹក​រលឹកដែលកម្ពុជាបានរៀបចំបានល្អប្រសើរ និងបានជំរុញទឹ​កចិត្ត​ឲ្យ​ប្រជាពលរដ្ឋ​ខ្មែរ​រួមគ្នា​លេង​កីឡា និងបង្កើតការចង់ចាំជាប្រវត្តិសាស្រ្ដសម្រាប់ព្រឹត្តិការណ៍ស៊ីហ្គមឆ្នាំ២០២៣ កន្លង​ទៅ​នេះ​។

ក្រុមអត្តពលិកមេដាយមាស ប្រាក់ និងពលរដ្ឋនានាទៀត បានថ្លែងប្រាប់ BTV នៅថ្ងៃទី៦ ខែ​ឧសភា​នេះ​ថា មកដល់ខែឧសភា ឆ្នាំ២០២៤នេះ មានរយៈពេល១ឆ្នាំហើយ ដែលកម្ពុជា​បាន​ធ្វើ​ជាម្ចាស់​ផ្ទះរៀបចំព្រឹត្តិការណ៍ប្រកួតកីឡា ស៊ីហ្គេម ជាលើកដំបូងឡើងវិញ ហើយ​តាម​រយៈ​ព្រឹត្តិការណ៍​មហា​ជោគជ័យនេះ គឺបានធ្វើឲ្យបណ្តាប្រតិភូកីឡា និងអត្តពលិកក្នុង​តំបន់​អាស៊ាន​កោត​សរសើរ​កម្ពុជា និងបានផ្សព្វផ្សាយកិត្តិនាមកម្ពុជា រៀបចំស៊ីហ្គេមល្បីពេញឆាកអន្តរជាតិ។ ក្នុង​នាមជាពលរដ្ឋ និងជាអត្តលិកខ្មែរ ពួកគេប្តេជ្ញាប្រឹងហាត់ និងលេងកីឡាបន្ថែមទៀត ដើម្បី​ដណ្តើម​យក​មេដាយជូនជាតិ ក្នុងព្រឹត្តិការណ៍ប្រកួតកីឡាផ្សេងៗនាពេលខាងមុខ។

ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំយុវជន និងកីឡា បានថ្លែងថា អំឡុង​ពេល​កម្ពុជា​ធ្វើ​ជា​ម្ចាស់​រៀបចំប្រកួតកីឡាស៊ីហ្គេមលើកទី៣២ចប់ភ្លាម កាលនោះមជ្ឈដ្ឋានអន្តរជាតិ មាន​មជ្ឈ​ដ្ឋាន​អន្តរជាតិ ចូលទស្សនាតាមប្រព័ន្ធផ្សព្វផ្សាយសង្គមនានាដូចជាហ្វេសប៊ុក និងតិចតុក ជាដើម​គឺ​មាន​ចំនួនអ្នកចូលរួមទស្សនា (View) បានប្រមាណ ៣០ពាន់លាននាក់ ហើយមក​ដល់​ខែ​ឧសភា​ ឆ្នាំ២០២៤នេះ ចំនួនអ្នកចូលទស្សនា View កើនរហូត ៣២ពាន់លាននាក់។

ឯកឧត្តម វ៉ាត់ ចំរើន បញ្ជាក់ថា ចំនួនមជ្ឈដ្ឋានអន្តរជាតិ ដែលចូល​ទស្សនា​តាម​ប្រព័ន្ធ​ផ្សព្វ​ផ្សាយ​អន​ឡាញ​នោះ ភាគច្រើន គេចូលទស្សនាព្រឹត្តិការណ៍បើកប្រកួតកីឡាស៊ីហ្គេមលើកទី៣២ ក្រោម​អធិបតី​ភាព​ដ៏ខ្ពស់ខ្ពស់បំផុត សម្តេចតេជោ ហ៊ុន សែន ដែលកាលនោះ​ជា​នាយករដ្ឋ​មន្ត្រីនៃ​ព្រះរាជា​ណា​ចក្រកម្ពុជា និងការចូលទស្សនា ប្រកួតកីឡា របស់កីឡាការនី ប៊ូ សំណាង ដែលត្រូវ​បាន​ទូរទស្សន៍ CNN យកទៅផ្សព្វផ្សាយបន្ត៕ អត្ថបទ ស៊ុម សុខជា