រដ្ឋមន្ត្រីការពារជាតិអ៊ីតាលី បាននិយានៅថ្ងៃចន្ទនេះថា ទណ្ឌកម្មសេដ្ឋកិច្ចប្រឆាំងនឹងរុស្ស៊ី បានបរាជ័យ ហើយបានអំពាវនាវឲ្យលោកខាងលិចប្រឹងប្រែងកាន់តែខ្លាំងឡើង ក្នុងការចរចារកដំណោះស្រាយការទូតជាមួយប្រធានាធិបតី វ្ល៉ាឌីមៀ ពូទីន ដើម្បីបញ្ចប់សង្គ្រាមនៅអ៊ុយ   ក្រែន។

លោក Guido Crosetto បានប្រាប់សារព័ត៌មាន Il Messaggero ប្រចាំថ្ងៃថា លោកខាងលិច បានជឿខុសទំនងថា ការដាក់ទណ្ឌកម្មរបស់ខ្លួន អាចបញ្ឈប់ការឈ្លានពានរបស់រុស្ស៊ី ប៉ុន្តែខ្លួនបានវាយតម្លៃលើស     ឥទ្ធិពលសេដ្ឋកិច្ចរបស់ខ្លួន នៅក្នុងពិភពលោក។

លោក Crosetto បានបញ្ជាក់ថា៖«ផ្ទុយទៅវិញ... មធ្យោបាយតែមួយគត់ដើម្បីដោះស្រាយវិបត្តិនេះ គឺ   ត្រូវមានការចូលរួមពីមនុស្សគ្រប់គ្នា ជាដំបូង (ដើម្បីទទួលបាន)បទឈប់បាញ់ និងបន្ទាប់មក គឺសន្តិភាព»។

ជាចម្លើយទៅនឹងការជំទាស់របស់អ្នកសម្ភាសន៍ដែលថា លោកពូទីន បានបង្ហាញពីឆន្ទៈក្នុងការចរចានោះ លោក Crosetto បានឆ្លើយតបថា៖«នោះជាហេតុផលដ៏ល្អសម្រាប់ពួកយើង ក្នុងការព្យាយាមបន្ថែមទៀត។ យើងមិនត្រូវបោះបង់ចោលផ្លូវការទូត ដែលអាចទៅរួចនោះទេ ទោះបីជាវាតូចចង្អៀតក៏ដោយ»។

ទោះជាយ៉ាងណាក៏ដោយ លោក Crosetto បានការពារការសម្រេចចិត្តរបស់អ៊ីតាលី ក្នុងការបន្តបញ្ជូនអាវុធទៅអ៊ុយក្រែន ដោយនិយាយថា នេះគឺមានគោលបំណង ដើម្បីទទួលបាន «ពេលវេលានិងលក្ខខណ្ឌដើម្បីសម្រេចបាននូវបទឈប់បាញ់ និងសន្តិភាព»។

នៅឆ្នាំនេះ ប្រទេសអ៊ីតាលី កាន់តំណែងជាប្រធានប្តូរវេននៃក្រុមប្រទេសប្រជាធិបតេយ្យធំៗទាំង៧         (G-7)។