ប្រធានាធិបតីអាមេរិក លោក Joe Biden នឹងជួបជាមួយសម្ព័ន្ធមិត្តមជ្ឈិមបូព៌ា គឺព្រះមហាក្សត្រ Abdullah II នៃប្រទេសហ្ស៊កដានី នៅសេតវិមាន នាថ្ងៃចន្ទ (ទី៦ ខែឧសភា) នេះ ដោយជំនួបនេះកើតមានឡើងជាមួយនឹងការរំពឹងទុក ក្នុងការមានបទឈប់បាញ់ នៅតំបន់ហ្កាហ្សា ហាក់មានកាន់តែតិចទៅៗ ហើយក្រុមអ៊ីស្លាមប៉ាឡេស្ទីនហាម៉ាស និងមន្ត្រីអ៊ីស្រាអែល បានបន្ទោសគ្នាទៅវិញទៅមក សម្រាប់ការជាប់គាំងនេះ។

កាលពីថ្ងៃអាទិត្យ ក្រុមហាម៉ាសបានអះអាងជាថ្មីនូវការទាមទាររបស់ខ្លួន ដែលថា ឲ្យបញ្ចប់សង្គ្រាមជាថ្នូរនឹងការដោះលែងចំណាប់ថ្នូរ តែនាយករដ្ឋមន្ត្រីអ៊ីស្រាអែល Benjamin Netanyahu បានច្រានចោលការការចង់បាននោះទាំងស្រុង។ ក្នុងពេលក្រុមជម្លោះទាំង២ កំពុងចរចាគ្នាស្វែងរកបទឈប់បាញ់ ក្រុមហាម៉ាសក៏បានវាយប្រហារលើតំបន់ Kerem Shalom ជាទីកន្លែងឆ្លងកាត់ចូលទៅក្នុងតំបន់ហ្កាហ្សា ដែលអ៊ីស្រាអែលបាននិយាយថា ការប្រហារនោះបានសម្លាប់ទាហានរបស់ខ្លួន ៣នាក់ផងដែរ។

អ្នកការទូតហ្ស៊កដានីម្នាក់ បានប្រាប់សារព័ត៌មាន Reuters នៅថ្ងៃចន្ទនេះថា កិច្ចប្រជុំ រវាងលោក Biden ជាមួយស្តេច Abdullah មិនមែនជាជំនួបទ្វេភាគីផ្លូវការទេ ប៉ុន្តែជាជំនួបឯកជនក្រៅផ្លូវការ។ ជំនួបនេះកើតឡើងនៅពេលដែលរដ្ឋបាលរបស់លោក Biden និងមន្ត្រីអ៊ីស្រាអែល នៅតែមានការខ្វែងគំនិតគ្នា ជុំវិញការលុកលុយដែលបានគ្រោងទុករបស់យោធាអ៊ីស្រាអែល នៅទីក្រុង Rafah។

សេតវិមានបានឲ្យដឹងថា លោក Biden បាននិយាយលើកចុងក្រោយទៅកាន់លោក Netanyahu កាលពីថ្ងៃទី២៨ ខែមេសា ហើយលោកបាន «បញ្ជាក់ឡើងវិញនូវជំហរច្បាស់លាស់របស់លោក» ជុំវិញការលុកលុយដែលអាចកើតមានលើទីក្រុងព្រំដែន Rafah របស់តំបន់ហ្កាហ្សា។ ប្រធានាធិបតីអាមេរិក បានបញ្ចេញការទាមទាររបស់លោកថា អ៊ីស្រាអែលមិនត្រូវធ្វើការវាយលុកនៅទីក្រុង Rafah ដោយគ្មានផែនការការពារជនស៊ីវិលប៉ាឡេស្ទីននោះឡើយ។

ជាមួយនឹងការតវ៉ាគាំទ្រប៉ាឡេស្ទីន បានផ្ទុះឡើងនៅទូទាំងបរិវេណសាកលវិទ្យាល័យរបស់សហរដ្ឋអាមេរិក លោក Biden ប្រឈមនឹងសម្ពាធកាន់តែខ្លាំងឡើងផ្នែកនយោបាយ ដែលត្រូវបញ្ចុះបញ្ចូលអ៊ីស្រាអែលឲ្យបញ្ឈប់ការលុកលុយ។ លោក Biden បាននិយាយទៅកាន់ភាពចលាចលក្នុងបរិវេណសាលា ជុំវិញសង្គ្រាមនៅហ្គាហ្សា កាលពីសប្តាហ៍មុន ប៉ុន្តែបាននិយាយថា ការតវ៉ានៅក្នុងបរិវេណសាលាមិនបានបង្ខំឲ្យលោកពិចារណាឡើងវិញនូវគោលនយោបាយរបស់លោកនៅមជ្ឈិមបូព៌ានោះទេ៕