កំពង់ឆ្នាំង៖ ឯកឧត្តម ចាន់ ដារ៉ុង រដ្ឋលេខាធិការ សមាជឹកគណៈកម្មាធិការធិការលទ្ធកម្ម តំណាងឯកឧត្តម ឆាយ ឫទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ នៅថ្ងៃទី០៧ ខែឧសភា ឆ្នាំ២០២៤នេះ បានដឹកនាំគណ:កម្មការអន្តរក្រសួង រួមមានក្រសួងអភិវឌ្ឍន៍ជនបទ និងតំណាងក្រសួង សេដ្ឋកិច្ច និងហិរញ្ញវត្ថុ ,លោក ជិន រដ្ឋា ប្រធានមន្ទីរអភិវឌ្ឍន៍ជនបទខេត្តកំពង់ឆ្នាំង និងមន្ត្រីបច្ចេកទេសផ្លូវជនបទចុះត្រួតពិនិត្យ និងវាយតម្លៃបញ្ចប់សុពលភាព លើការងារថែទាំផ្លូវជាលក្ខណៈខួប ដោយក្រាលល្បាយក្រួសក្រហមចំនួន៣ខ្សែ ស្ថិតក្នុងស្រុកកំពង់លែង ស្រុកកំពង់ត្រឡាច និងស្រុកទឹកផុស ខេត្តកំពង់ឆ្នាំង។

ឯកឧត្តម ចាន់ ដារ៉ុង រដ្ឋលេខាធិការបានណែនាំថា៖ ដើម្បីអោយផ្លូវទាំង៣ខ្សែនេះធានាបាននូវការប្រើប្រាស់សូមអោយម្ចាស់ក្រុមហ៊ុនសាងសង់ត្រូវតែគោរពទៅគោលការណ៍បច្ចេកទេសមានស្តង់ដារត្រឹមត្រូវ។ គណៈកម្មការអន្តរក្រសួងបានឯកភាពទទួលយកលើការងារបញ្ចប់សុពលភាព គម្រោងថែទាំផ្លូវជាលក្ខណៈខួបផ្លូវទាំង៣ខ្សែខាងលើនេះ និងបានអំពាវនាវដល់បងប្អូនប្រជាពលរដ្ឋសូមចូលរួមថែរក្សាផ្លូវទាំង៣ខ្សែនេះ អោយបានល្អប្រសើរ ដើម្បីជាប្រយោជន៍ដល់ការធ្វើដំណើរ ការដឹកកសិផលនានា ការទៅមកសាលារៀន និងទៅកាន់មន្ទីរពេទ្យ សំខាន់គឺការប្រើប្រាស់អោយបានយូរអង្វែង។ ផ្លូវទាំង៣ខ្សែនេះអនុវត្តដោយមន្ទីរអភិវឌ្ឍន៍ជនបទខេត្តកំពង់ឆ្នាំង ស្ថិតក្នុងផែនការឆ្នាំ២០២៣។

ដោយឡែកប្រជាពលរដ្ឋដែលជាអ្នកប្រើប្រាស់ផ្លូវទាំង៣ខ្សែនេះ បានអោយដឹងថា៖ ពីមុនផ្លូវទាំងនេះ គឺជាផ្លូវរទេះ និងមានជង្ហុគបែកភក់ជ្រាំក្នុងរដូវវស្សា រួមនិងពិបាកក្នុងការធ្វើដំណើរនៅរដូវប្រាំងផងដែរ។ ដោយការយកចិត្តទុកដាក់ពីសម្តេចធិបតី ហ៊ុន ម៉ាណែត ក្នុងការកែលម្អផ្លូវជនបទអោយល្អប្រសើរ តាមរយៈក្រសួងអភិវឌ្ឍន៍ជនបទ ក្នុងឆ្នាំ២០២៣កន្លងមក ផ្លូវទាំង៣ខ្សែនេះ បានប្រែក្លាយពីផ្លូវរទេះទៅជាផ្លូវក្រាលគ្រួសក្រហមងាយស្រួលក្នុងការធ្វើដំណើរទៅមក ការដឹកកសិផល និងប្រើប្រាស់ផ្សេងៗទៀត។

សូមបញ្ជាក់ថា ៖ ការចុះត្រួតពិនិត្យ វាយតម្លៃ និងបញ្ចប់សុពលភាព លើការងារថែទាំខួបផ្លូវក្រាលគ្រួសក្រហមចំនួន៣ខ្សែប្រវែងសរុប២៣៥០០ម៉ែត្រ ទទឹង៤,៥ម៉ែត្រ កម្រាស់០,១៥ម៉ែត្រ ដែលខ្សែទី១ស្ថិតក្នុងឃុំត្រងិល ឃុំស្វាយរំពារ ស្រុកកំពង់លែង, ខ្សែទី២ស្ថិតក្នុងឃុំថ្មឥដ្ឋ ឃុំឈូកស ស្រុកកំពង់ត្រឡាច, និងខ្សែទី៣ស្ថិតក្នុងឃុំអភិវឌ្ឍន៍ ស្រុកទឹកផុស ខេត្តកំពង់ឆ្នាំង ( ជាគម្រោងលេខDRR-PM-2023.No.010) ដែលអនុវត្តដោយមន្ទីរអភិវឌ្ឍន៍ជនបទខេត្តកំពង់ឆ្នាំង ៕ ដោយ ៖ កាំង ហុងវាស្នា