លោកស្រី Nakamitsu Izumi ប្រធានការិយាល័យទទួលបន្ទុកកិច្ចការរំសាយអាវុធរបស់អង្គការសហប្រជាជាតិ បានជួបសម្ភាសន៍ជាមួយប្រព័ន្ធផ្សព្វផ្សាយរដ្ឋជប៉ុន NHK ដោយបាននិយាយថា អង្គការសហប្រជាជាតិ ចង់បង្កើតការយល់ដឹងអំពីផលប៉ះពាល់នៃការប្រើប្រាស់បញ្ញាសិប្បនិមិត្ត ឬ AI របស់យោធា។

មន្ត្រីរូបនេះ សង្ឃឹមថាការយល់ដឹងបែបនេះ នឹងបង្កើនល្បឿនការពិភាក្សាអំពីតម្រូវការសម្រាប់បទប្បញ្ញត្តិអន្តរជាតិ។ អាវុធបញ្ញាសិប្បនិមិត្ត ឬ សព្វាវុធ AI ត្រូវបានរាយការណ៍ថា ត្រូវបានគេប្រើនៅតំបន់ហ្កាហ្សា និងនៅប្រទេសអ៊ុយក្រែន។ បច្ចុប្បន្ន ប្រទេសជាច្រើន កំពុងផលិតអាវុធប្រភេទនេះ។

លោកស្រី Nakamitsu បានគិតថា វាជាហេតុការណ៍នៃមានវិបត្តិ ដោយសារតែសព្វាវុធ AI ពិតជាត្រូវបានផលិតឡើងសម្រាប់ការប្រើប្រាស់ក្នុងសម័យសង្គ្រាម។ លោកស្រី ព្រួយបារម្ភថា បច្ចេកវិទ្យាសព្វាវុធ AI នឹងនាំមកនូវការផ្លាស់ប្តូរយ៉ាងសំខាន់នៅក្នុងវិធីដែលសង្រ្គាមត្រូវបានធ្វើឡើង និងនៅក្នុងការប្រយុទ្ធ។ ការព្រួយបារម្ភ កំពុងកើនឡើងជាពិសេសអំពីប្រព័ន្ធអាវុធស្វ័យប្រវត្តិបង្កគ្រោះថ្នាក់។ ប្រព័ន្ធអាវុធទាំងនេះ ជ្រើសរើស និងវាយប្រហារ គោលដៅ ដោយគ្មានការណែនាំពីមនុស្ស។

កាលពីឆ្នាំមុន អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យរដ្ឋជាសមាជិក អនុម័តក្របខ័ណ្ឌច្បាប់ប្រព័ន្ធអាវុធស្វ័យប្រវត្តិបង្កគ្រោះថ្នាក់នៅត្រឹមឆ្នាំ២០២៦ ព្រោះថាបច្ចុប្បន្នពុំមានច្បាប់អន្តរជាតិគ្រប់គ្រងសព្វាវុធទាំងនេះទេ។ លោកស្រី និយាយថា ប្រទេសមហាអំណាចយោធាធំៗ កំពុងព្យាយាមឈានទៅរកការអភិវឌ្ឍន៍ប្រព័ន្ធអាវុធស្វ័យប្រវត្តិបង្កគ្រោះថ្នាក់។

លោកស្រី បានលើកឡើងពីលទ្ធភាពដែលក្រុមភេរវករ និងអង្គការផ្សេងទៀត អាចរំលោភលើបញ្ញាសិប្បនិមិត្ត ឬ AI។ លោកស្រី បានបញ្ជាក់ថា វាមានសារៈសំខាន់ ក្នុងការធ្វើឱ្យប្រទេសនានា និងប្រជាជនទាំងអស់យល់ថា ការប្រើប្រាស់ខុសចំពោះ AI អាចមានផលវិបាកអវិជ្ជមានខ្លាំង។