ឯកអគ្គរដ្ឋទូតរបស់ទីក្រុងមូស្គូ ប្រចាំនៅសហរដ្ឋអាមេរិក លោក អាណាថូលី អាន់ថូនៅ (Anatoly Antonov) បាននិយាយកាលពីថ្ងៃអង្គារ (០៧ ឧសភា) ការសម្រេចចិត្តរបស់រុស្ស៊ី ក្នុងការធ្វើសមយុទ្ធអាវុធនុយក្លេអ៊ែរជាយុទ្ធសាស្ត្រ គឺជាការឆ្លើយតបដោយបង្ខំចំពោះគោលនយោបាយ «ឥតអៀនខ្មាស និងបែបឈ្លានពាន» របស់លោកខាងលិច ដែលបង្កើតការគំរាមកំហែងផ្នែកសន្តិសុខសម្រាប់រុស្ស៊ី និងពលរដ្ឋរបស់ខ្លួន។

ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) កាលពីថ្ងៃចន្ទ បានបញ្ជាឱ្យធ្វើសមយុទ្ធមួយ ក្នុងការប្រើប្រាស់អាវុធនុយក្លេអ៊ែរយុទ្ធសាស្ត្រ នៅក្នុងតំបន់យោធាភាគខាងត្បូង ដែលជាប់ព្រំដែនអ៊ុយក្រែន។ ក្រសួងការបរទេស និងក្រសួងការពារជាតិនៅទីក្រុងមូស្គូ បាននិយាយនៅក្នុងសេចក្តីថ្លែងការណ៍ជាសាធារណៈថា សមយុទ្ធនេះមានគោលបំណងជាការព្រមានដល់សហរដ្ឋអាមេរិក និងសម្ព័ន្ធមិត្តរបស់ខ្លួនកុំឱ្យធ្វើឱ្យជម្លោះអ៊ុយក្រែន កាន់តែកើនឡើងថែមទៀត។

យោងតាមលោក អាន់ថូនៅ បានឱ្យដឹងថា សហរដ្ឋអាមេរិក និងសម្ព័ន្ធមិត្តកំពុងបន្តបង្កើនការផ្គត់ផ្គង់អាវុធកាន់តែគ្រោះថ្នាក់ដល់អ៊ុយក្រែន ដែលត្រូវបានរចនាឡើងដើម្បី «សម្លាប់ប្រជាជនរុស្ស៊ី» និងវាយប្រហារលើទឹកដីនៃប្រទេសនេះ។

ក្រសួងការបរទេសរុស្ស៊ីនិយាយថា គោលនយោបាយរបស់ប្លុកដែលដឹកនាំដោយសហរដ្ឋអាមេរិក ក្នុងការធ្វើឱ្យមាន «ភាពបរាជ័យជាយុទ្ធសាស្ត្រ» លើប្រទេសរុស្ស៊ី កំពុងនាំទៅរក «ការកើនឡើងបន្ថែមទៀតនៃវិបត្តិអ៊ុយក្រែន ឆ្ពោះទៅរកការប៉ះទង្គិចគ្នាដោយបើកចំហខាងយោធា» រវាងអង្គការណាតូ និងទីក្រុងមូស្គូ។ ក្រសួងនេះបានលើកយក «សេចក្តីថ្លែងការណ៍បង្កហេតុ និងការគំរាមកំហែងប្រឆាំងនឹងរុស្ស៊ី ដោយមន្ត្រីលោកខាងលិចមួយចំនួន» ជាហេតុផលសម្រាប់សមយុទ្ធនេះ៕