បើយោងតាមមន្ត្រីចិន បានឲ្យដឹងថា ប្រទេសចិនអាចនឹងបញ្ចេញសំឡេងនៃការសន្ទនាគ្នាតាមទូរសព្ទជាមួយមន្ត្រីយោធាហ្វីលីពីន ក្នុងពេលឆាប់ៗនេះ ដែលទីក្រុងប៉េកាំងអះអាងថា ជាភស្តុតាងនៃកិច្ចព្រមព្រៀងលើទឹកដីដែលមានជម្លោះ នៅក្នុងសមុទ្រចិនខាងត្បូង។

នៅក្នុងការនិយាយតាមទូរសព្ទដែលត្រូវបានអះអាងថា កើតមានកាលពីថ្ងៃទី៣ ខែមករានោះ អនុឧត្តមនាវីឯកលោក Alberto Carlos ដែលជាប្រមុខបញ្ជាការខាងលិចរបស់យោធាហ្វីលីពីន យល់ស្របតាម «គំរូថ្មី» ក្នុងការដោះស្រាយ ចំពោះបេសកកម្មផ្ដល់សម្ភារផ្គត់ផ្គង់ដល់កងទ័ពនៅតំបន់ថ្មប៉ប្រះទឹក Second Thomas Shoal ដែលកាន់កាប់ដោយហ្វីលីពីន នៅសមុទ្រចិនខាងត្បូង។ នេះបើយោងតាមប្រតិចារឹកដែលផ្តល់ដោយមន្ត្រីចិនទៅសារព័ត៌មាន Bloomberg News។ ដោយសុំមិនបញ្ចេញអត្តសញ្ញាណ ដោយសារពួកគេមិនមានសិទ្ធិនិយាយពីខ្សែអាត់សំឡេងនោះ មន្ត្រីទាំងនោះបានប្រាប់ថា ប្រតិចារឹកអាចនឹងត្រូវបានបញ្ចេញជាសាធារណៈ ក្នុងរង្វង់រយៈពេលប៉ុន្មានថ្ងៃខាងមុខ។

គួរបញ្ជាក់ថា សេចក្តីថ្លែងការណ៍របស់ចិនបានធ្វើឡើងចុងក្រោយបង្អស់ អំឡុងពេលមានសង្គ្រាមពាក្យសម្តី រវាងចិន និងភាគីម្ខាងទៀត ដែលមានហ្វីលីពីន និងសហរដ្ឋអាមេរិក ជុំវិញផ្នែកដែលមានជម្លោះនៃសមុទ្រចិនខាងត្បូង។ ភាពតានតឹងបានកើនឡើងក្នុងប៉ុន្មានខែថ្មីៗនេះ ដោយនាវាចិនបានប្រើកាណុងបាញ់ទឹក ដើម្បីវាយប្រហារម្ដងហើយម្ដងទៀតលើនាវាហ្វីលីពីន ដែលព្យាយាមផ្ដល់សម្ភារផ្គត់ផ្គង់ដល់កងទ័ពឈរជើងនៅលើនាវា Sierra Madre ជានាវាសល់ពីសម័យសង្គ្រាមលោកលើកទី២ ដែលចតចោលនៅតំបន់ថ្មប៉ប្រះទឹក Second Thomas Shoal។

ក្រសួងការបរទេសចិនបានឲ្យដឹងនៅក្នុងប៉ុន្មានថ្ងៃថ្មីៗនេះថា ការពិភាក្សាលើ «គំរូថ្មី» ត្រូវបានធ្វើឡើងនៅឆ្នាំនេះជាមួយទីបញ្ជាការខាងលិចរបស់យោធាហ្វីលីពីន ហើយគំរូនោះត្រូវបានអនុម័តដោយមន្ត្រីគ្រប់ថ្នាក់នៃបញ្ជាការនោះ ក្នុងនោះរួមទាំងពីរដ្ឋមន្ត្រីការពារជាតិហ្វីលីពីន លោក Gilberto Teodoro Jr. និង ទីប្រឹក្សាសន្តិសុខជាតិ លោក Eduardo Ano ផងដែរ។ តែពួកគេទាំង ២រូប បានបដិសេធការលើកឡើងរបស់ទីក្រុងប៉េកាំង កាលពីចុងសប្តាហ៍កន្លងមក។

 ប្រតិចារិកនៃការហៅទូរសព្ទដែលត្រូវបានរាយការណ៍នោះ បានដកស្រង់សម្តីរបស់លោក Carlos ដែលនិយាយថា លោក Teodoro លោក Ano និងប្រធានបុគ្គលិកនៃកងកម្លាំងប្រដាប់អាវុធលោកឧត្តមសេនីយ៍ Romeo Brawner បានចុះហត្ថលេខាលើកិច្ចព្រមព្រៀងនេះ។ នៅពេលសួរកាលពីថ្ងៃអង្គារ (ទី៧ ខែឧសភា) អំពីការអះអាងរបស់ចិន ដែលថា មានសំឡេងនៃការហៅទូរសព្ទជាមួយលោក Carlos លោក Teodoro បាននិយាយថា លោកមិនដឹងអ្វីអំពីរឿងនេះនោះទេ៕