ក្រុមមន្ត្រីបាននិយាយថា សពជនរងគ្រោះទី៦ និងចុងក្រោយគេ ដែលបានស្លាប់នៅក្នុងហេតុការណ៍រលំបាក់ស្ពាន Francis Scott Key ក្នុងទីក្រុង Baltimore សហរដ្ឋអាមេរិក ត្រូវបានរកឃើញហើយ កាលពីថ្ងៃអង្គារ (ទី៧ ខែឧសភា) ដែលនាំឲ្យបេសកកម្មស្រង់សពដ៏លំបាកត្រូវបានបិទបញ្ជប់ បន្ទាប់ពីមានឧបទ្ទវហេតុបាក់រលំស្ពានដ៏អាក្រក់បំផុតរបស់ប្រទេសនេះ ក្នុងរយៈពេលជាង ១ទសវត្សរ៍។

ជនរងគ្រោះនេះឈ្មោះ Jose Mynor Lopez វ័យ ៣៧ឆ្នាំ គឺជាសមាជិកនាវិកការងារ ដែលបាន និងធ្វើការងារជួសជុលកន្លែងខូចខាតនៅលើស្ពាន នៅពេលដែលស្ពានត្រូវបានបុក កាលពីថ្ងៃទី២៦ ខែមីនា ដោយនាវា Dali ជានាវាកុងតឺន័រដែលកំពុងធ្វើដំណើរទៅកាន់ប្រទេសស្រីលង្កា ដែលទំនងជាដាច់ចរន្តអគ្គិសនីបន្ទាប់ពីចាកចេញពីកំពង់ផែនៅទីក្រុង Baltimore។

មិតរួមការងាររបស់លោកចំនួន ៥នាក់ទៀត ក៏បានស្លាប់នៅក្នុងហេតុការណ៍បាក់រលំនេះផងដែរ ហើយវាត្រូវចំណាយពេល ៦សប្តាហ៍ ដើម្បីស្វែងរកសពទាំងអស់។ កម្មករ ២នាក់ផ្សេងទៀតត្រូវបានជួយសង្គ្រោះចេញពីទឹកក្នុងរយៈពេលប៉ុន្មានម៉ោង បន្ទាប់ពីស្ពានបាក់រលំ។

កម្មករទាំងអស់ដែលបានបាត់បង់ជីវិត គឺជាជនអន្តោប្រវេសន៍មកពីប្រទេសអែលសាល់វ៉ាឌ័រ កាតេម៉ាឡា ហុងឌូរ៉ាស និងម៉ិកស៊ិក។ ចំណែកលោក Lopez មកពីប្រទេសកាតេម៉ាឡា ហើយបានធ្វើដំណើរទៅកាន់ទីក្រុង Baltimore ដើម្បីបានការងារដែលធ្វើឲ្យជីវភាពប្រសើរជាងមុន។ នេះបើតាមការឲ្យដឹងពីបងប្រុសរបស់សព គឺលោក Jovani Lopez៕