ប្រធានាធិបតី ប្រទេសរ៉ូម៉ានី លោក ក្លៅស៍ អាយអូហានីស(Klaus Iohannis) បាននិយាយកាលពីថ្ងៃអង្គារថា លោកបើកចំហរដើម្បីពិភាក្សាអំពីការបញ្ជូនប្រព័ន្ធមីស៊ីល ប៉ាទ្រីយ៉ូត(Patriot) ទៅកាន់ប្រទេសអ៊ុយក្រែន បន្ទាប់ពីអាល្លឺម៉ង់ បានអំពាវនាវទៅកាន់សហភាពអឺរ៉ុប និងរដ្ឋជាសមាជិកសម្ព័ន្ធយោធាណាតូ ដើម្បីពង្រឹងការការពារដែនអាកាសរបស់អ៊ុយក្រែន។

បន្ទាប់ពីការអំពាវនាវរបស់ប្រធានាធិបតីអ៊ុយក្រែន លោក Volodymyr Zelenskiy រដ្ឋាភិបាលសហភាពអឺរ៉ុប ត្រូវបានសុំដោយទទូចកាលពីខែមុនដើម្បីផ្គត់ផ្គង់ប្រព័ន្ធការពារដែលចាំបាច់ខ្លាំងបំផុតបន្ថែមទៀតដល់ទីក្រុងគីវ។ ប្រទេសអាល្លឺម៉ង់ បានសន្យាផ្តល់ប្រព័ន្ធមីស៊ីល ប៉ាទ្រីយ៉ូត(Patriot) បន្ថែមទៀត ខណៈប្រទេសអេស្ប៉ាញ បាននិយាយថាខ្លួននឹងផ្តល់មីស៊ីលប៉ាទ្រីយ៉ូតប្រឆាំងយន្តហោះ ។ ប្រទេសអឺរ៉ុបផ្សេងទៀត រួមមានប្រទេសក្រិក ហូឡង់ ប៉ូឡូញ រូម៉ានី និងប្រទេសស៊ុយអែត មានប្រព័ន្ធមីស៊ីល Patriot រួចហើយ។ លោក Iohannis និយាយទៅកាន់អ្នកសារព័ត៌មានក្នុងទីក្រុងវ៉ាស៊ីនតោន បន្ទាប់ពីជំនួបជាមួយប្រធានាធិបតីសហរដ្ឋអាមេរិក លោក Joe Biden នៅវ៉ាស៊ីនតោនថា មានការពិភាក្សាអំពីថាតើនរណាអាចបញ្ជូនប្រព័ន្ធមីស៊ីល Patriot ទៅកាន់ប្រទេសអ៊ុយក្រែន ក្នុងរយៈពេលប៉ុន្មានសប្តាហ៍ខាងមុខនេះ។ ប្រធានាធិបតី Biden បានលើកឡើងថា នៅក្នុងជំនួប លោកបាននិយាយថា លោកបើកចំហសម្រាប់ការពិភាក្សា។ លោកត្រូវតែពិភាក្សាអំពីបញ្ហានេះ នៅក្នុងក្រុមប្រឹក្សាជាន់ខ្ពស់ការពារជាតិ ដើម្បីពិនិត្យមើលនូវអ្វីដែលយើងអាចផ្តល់ឲ្យ និងអ្វីដែលយើងអាចទទួលបានមកវិញ។ ប្រទេសរូម៉ានី បានចុះហត្ថលេខាលើកិច្ចព្រមព្រៀងចំនួន៤ពាន់លានដុល្លារ ដើម្បីទទួលបានប្រព័ន្ធមីស៊ីល Patriots ក្នុងឆ្នាំ២០១៧ ជាកិច្ចសន្យាលទ្ធកម្មធំបំផុតរបស់រដ្ឋសម្ព័ន្ធយោធាណាតូនិងសហភាពអឺរ៉ុប រហូតមកដល់បច្ចុប្បន្ន ដោយការដឹកជញ្ជូនលើកដំបូងត្រូវបានធ្វើឡើងនៅឆ្នាំ២០២០។

សេតវិមាន បាននិយាយថា លោក Biden បានអរគុណដល់ប្រទេសរូម៉ានី សម្រាប់ការប្តេជ្ញាចិត្តរបស់ខ្លួនចំពោះសន្តិសុខនៅភាគខាងកើតរបស់សម្ព័ន្ធយោធាណាតូ រួមទាំងនៅក្នុងតំបន់សមុទ្រខ្មៅ និងបានសាទរចំពោះការវិនិយោគលើវិស័យការពារជាតិរបស់ខ្លួន ដែលលើសពីគោលដៅរបស់ណាតូ ក្នុងការចំណាយយ៉ាងហោចណាស់ ២ភាគរយ នៃផលិតផលក្នុងស្រុកសរុប។