​​វាយ​កូន​បាល់៖ ​កីឡាករ​វាយ​កូន​បាល់​អាល្លឺម៉ង់ Alexander Zverev ដណ្តើមបាន​មេដាយមាស​លើ​វិញ្ញាសា​វាយ​កូន​បាល់​ឯកត្តជនឱ្យ​ប្រទេស​អាល្លឺម៉ង់ ​ក្រោយ​យកឈ្នះ​កីឡាករ​រុស្ស៊ី Karen Khachanov​។​ ​នេះ​ជា​ជោគជ័យ​ធំ​បំផុត​ក្នុង​អាជីព​របស់ Alexander Zverev ក្នុង​ជ័យជំនះ ៦-៣ និង ៦-១ លើ​កីឡាករ​រុស្ស៊ី​។​

​​Zverev ឡើងមក​ដល់​វគ្គ​ផ្តាច់ព្រ័ត្រ​នេះ​ក្រោយ​យកឈ្នះ​កីឡាករ​លេខ ១ ពិភពលោក Novak Djokovic​។ ​ងាក​មក​ប្រភេទ​កីឡា​ផ្សេង​វិញ កីឡាការិនី​ប្រេ​ស៊ី​ល Rebeca Andrade ប្រជែង​ឈ្នះ​មេដាយមាស​លើ​វិញ្ញាសា​កីឡា​កាយសម្ព័ន្ធ​ ក្រោយ​ទទួលបាន​ពិន្ទុ​ល្អ​ជាងគេ​។ ​មេដាយប្រាក់​ក្នុង​វិញ្ញាសា​នេះ​បាន​ទៅ​កីឡាការិនី​អាមេរិក MyKayla Skinner ដែល​មកដល់​វគ្គ​នេះ ​ក្រោយ​ការដកខ្លួន​របស់​ម្ចាស់​មេដាយ​មាស ២០១៦ Simone Biles ដោយសារ​បញ្ហា​សុខភាព ខណៈ​មេដាយសំរឹទ្ធ​បាន​ទៅ​កីឡាការិនី​កូរ៉េ Yeo Seojeong​។​

​​ងាក​មក​វិញ្ញាសា​លោតទឹក កីឡាការិនី​ចិន Shi Tingmao ដណ្តើមបាន​មេដាយមាស​ទី​២ ​របស់ខ្លួន​នៅលើ​វិញ្ញាសា​លោតទឹក​កំពស់ ៣ម៉ែត្រ​។​ ​មេដាយប្រាក់​ក៏បាន​ទៅ​ចិន​ដែរ​គឺ​កីឡាការិនី Wang Han និង​មេដាយសំរឹទ្ធ​បាន​ទៅ​កីឡាការិនី​អាមេរិក Krysta Palmer​។​ Shi Tingmao និង Wang Han ក៏​ជា​ដៃគូ​នឹង​គ្នា​ដែរ​ក្នុង​វិញ្ញាសា​លោតទឹក​ជា​គូ​កំពស់ ៣ម៉ែត្រ​នេះ​។​ ​Shi Tingmao មកដល់ពេលនេះ​ឈ្នះ​មេដាយ​មាស​អូឡាំពិក ៤​គ្រឿង​ហើយ​ក្នុង​អាជីព​៕

​អត្ថបទ​៖​នាង សុភា​វុ​ធ