តុលាការ នៅប្រទេសប៉ាគីស្ថាន បានធ្វើតាមសំណើពីភរិយារបស់អតីតនាយករដ្ឋមន្ត្រី លោក Imran Khan ដែលសុំឲ្យបញ្ចូនរូបលោកស្រីទៅកាន់ពន្ធនាគារ ជំនួសឲ្យការឃុំខ្លួនក្នុងផ្ទះដែលបញ្ជាដោយរដ្ឋាភិបាល។ នេះបើតាមការឲ្យដឹងពីមេធាវីរបស់ជនជាប់ទោស។

នៅក្នុងញត្តិរបស់លោកស្រីទៅកាន់តុលាការជាន់ខ្ពស់ទីក្រុងអ៊ីស្លាម៉ាបាដ លោកស្រី Bushra Bibi បានចោទប្រកាន់អាជ្ញាធរពីបទរំលោភលើឯកជនភាពរបស់លោកស្រី និងបម្រើអាហារគ្មានអនាម័យ នៅក្នុងបន្ទប់ផ្ទះរបស់លោកស្រី ដែលលោកស្រីខ្លួនឯងផ្ទាល់ និងមេធាវីរបស់លោកស្រី បាននិយាយថា ត្រូវបានគ្រប់គ្រងដោយពួកមនុស្សប្រុស ជាការចោទប្រកាន់ដែលបុគ្គលិកពន្ធនាគារបានបដិសេធ។

លោកស្រី Bibi និយាយថា លោកស្រីត្រូវបានឃុំខ្លួននៅក្នុងបន្ទប់មួយ នៅឯភូមិគ្រឹះលើកំពូលភ្នំរបស់លោក Khan ក្នុងទីក្រុងអ៊ីស្លាម៉ាបាដ ចាប់តាំងពីមានការកាត់ទោសកាលពីខែមករាលើប្តីប្រពន្ធមួយគូនេះពីបទចោទលក់អំណោយរបស់រដ្ឋដោយខុសច្បាប់។

គណបក្សរបស់លោកស្រី Bibi និងមន្ត្រីរដ្ឋបាលក្នុងតំបន់ម្នាក់ឈ្មោះ Afzaal Ahmad បានឲ្យដឹងថា តាមរយៈមេធាវីរបស់ខ្លួន លោកស្រីបានស្នើឲ្យផ្លាស់លោកស្រីទៅពន្ធនាគារ ដែលអាជ្ញាធរបានអនុវត្តភ្លាមៗ បន្ទាប់ពីតុលាការបានចេញដីកានេះ។

នៅក្នុងសេចក្តីថ្លែងការណ៍មួយ គណបក្សរបស់លោក Khan បានប្រាប់ថា តុលាការបានបញ្ជាឲ្យអាជ្ញាធរផ្លាស់លោកស្រី Bibi ទៅពន្ធនាគារ Adyala នៅក្នុងទីក្រុងយោធភូមិ Rawalpindi ជាកន្លែងដែលស្វាមីវ័យ ៧០ឆ្នាំរបស់លោកស្រី កំពុងអនុវត្តទោសជាប់ពន្ធនាគាររយៈពេល ១៤ឆ្នាំរបស់ខ្លួន៕