ភ្នំពេញ ៖ លោក ឡោ សុឡេង ប្រធានក្រុមការងាររាជរដ្ឋាភិបាលចុះមូលដ្ឋានស្រុកកោះសូទិន ខេត្តកំពងចាម នៅរសៀលថ្ងៃទី០៨ ខែឧសភា ឆ្នាំ២០២៤នេះ បានអញ្ជើញជាអធិបតីភាព ក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានឃុំទាំង៨ ក្នុងស្រុកកោះសូទិន។

ថ្លែងក្នុងឱកាសនោះ លោក ឡោ សុឡេងបានគូសបញ្ជាក់អំពីតួនាទីភារកិច្ចមួយចំនួនរបស់ក្រុមការងាររាជរដ្ឋាភិបាលចុះមូលដ្ឋានតាមបណ្ដាឃុំនីមួយៗ ដោយសំដៅចូលរួមចំណែកលើកកម្ពស់ទំនាក់ទំនងរវាងរាជរដ្ឋាភិបាល និងពង្រឹងប្រសិទ្ធភាពខ្ពស់ក្នុងការបម្រើសេវាសាធារណៈ ព្រមទាំងបំពេញតាមអ្វីដែលជាតម្រូវការចាំបាច់ របស់ប្រជាពលរដ្ឋក្នុងមូលដ្ឋាន។

ជាមួយគ្នានោះដែរលោក ឡោ សុឡេង បានណែនាំឲ្យក្រុមការងារទាំងអស់ ត្រូវបន្ដចុះតាមខ្នងផ្ទះ និងរៀបចំវេទិកាសាធារណៈដោយធ្វើជាទ្រង់ទ្រាយសមល្មម ប៉ុន្ដែឲ្យបាននូវអ្វីដែលជាបញ្ហាប្រឈម និងសេចក្ដីត្រូវការជាក់ស្ដែង។ ក្នុងករណីពិនិត្យឃើញថា អាចដោះស្រាយបានក្រុមការងារត្រូវចាត់ចែងដោះស្រាយបន្ទាន់ភ្លាមៗ ប៉ុន្ដែប្រសិនបើហួសដែនសមត្ថភាព ត្រូវរាយការណ៍មកលោកដើម្បីស្វែងរកដំណោះស្រាយ ពោលរាល់បញ្ហាទាំងអស់របស់ប្រជាពលរដ្ឋត្រូវតែដោះស្រាយ។ បន្ថែមពីនេះ ក្រុមការងារតាមមូលដ្ឋានក៏ត្រូវចូលរួមឧបត្ថម្ភគាំទ្រដល់សកម្មភាពនានា ក្នុងការអភិវឌ្ឍនៅមូលដ្ឋានដែលខ្លួនទទួលខុសត្រូវ និងត្រៀមលក្ខណៈចូលរួមអន្ដរាគមន៍សង្គ្រោះហេតុការណ៍ផ្សេងៗ ដែលអាចកើតមានឡើងដូចជា គ្រោះធម្មជាតិជាដើម ដោយហេតុថាបច្ចុប្បន្នបរិយាកាសកំពុងតែកើនឡើងនូវកម្តៅ ដូច្នេះត្រូវតែយកចិត្តដាក់ ពិសេសក្មេងៗសិស្សសាលាតែម្ដង។

ព្រមពេលដែលការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ កាន់តែខិតជិតចូលមកដល់នោះ លោក ឡោ សុឡេង បានផ្ដាំផ្ញើឲ្យអាជ្ញាធរមានសមត្ថកិច្ច ត្រូវពង្រឹងយកចិត្តទុកដាក់លើការងារថែរក្សាសន្ដិសុខ សណ្ដាប់ធ្នាប់ និងសុវត្ថិភាព ដើម្បីធានាឲ្យបានទាំងស្រុងនូវព្រឹត្តិការណ៍ដ៏សំខាន់នេះ។ ដោយឡែក ចំពោះអង្គបោះឆ្នោតត្រូវរក្សាសុខភាព និងត្រៀមឯកសារឲ្យបានគ្រប់គ្រាន់ផងដែរ៕

អត្ថបទ ៖ បាន ចក់