ក្រុមសកម្មប្រយុទ្ធប៉ាឡេស្ទីនហាម៉ាស បាននិយាយកាលពីថ្ងៃពុធ (០៨ ឧសភា) ថាខ្លួនមិនមានឆន្ទៈក្នុងការធ្វើសម្បទានបន្ថែមទៀតដល់អ៊ីស្រាអែល ក្នុងការចរចាអំពីបទឈប់បាញ់សម្រាប់តំបន់ហ្កាហ្សាទេ បើទោះបីជាកិច្ចចរចានៅតែបន្តធ្វើឡើងនៅទីក្រុងគែរ ក្នុងគោលបំណងផ្អាកការវាយលុករយៈពេលប្រាំពីរខែរបស់អ៊ីស្រាអែលក៏ដោយ។

អ៊ីស្រាអែល បានបន្តការវាយប្រហារតាមរថក្រោះ និងតាមអាកាសលើក្រុងរ៉ាហ្វា (Rafah) ភាគខាងត្បូងនៃតំបន់ហ្កាហ្សា កាលពីថ្ងៃពុធ ហើយបានគំរាមកំហែងបើកការវាយប្រហារដ៏ធំមួយលើក្រុងនេះ។ កងកម្លាំងរបស់ខ្លួនបានចល័តចូលតាមច្រកព្រំដែន រ៉ាហ្វា ជាមួយប្រទេសអេហ្ស៊ីប កាលពីថ្ងៃអង្គារ ដោយកាត់ផ្តាច់ផ្លូវជំនួយដ៏សំខាន់ និងច្រកចេញតែមួយគត់សម្រាប់ការជម្លៀសអ្នកជំងឺដែលរងរបួស។

លោក អ៊ីសហ្ស៊ាត អែលរ៉េស៊ីក (Izzat El-Reshiq) សមាជិកការិយាល័យនយោបាយរបស់ក្រុមហាម៉ាសក្នុងប្រទេសកាតា បាននិយាយនៅក្នុងសេចក្តីថ្លែងការណ៍មួយកាលពីល្ងាចថ្ងៃពុធថា ក្រុមនេះនឹងមិនយល់ព្រមហួសពីសំណើបទឈប់បាញ់ដែលខ្លួនទទួលយកកាលពីថ្ងៃចន្ទនោះទេ ដែលនឹងតម្រូវឱ្យមានការដោះលែងចំណាប់ថ្នូរអ៊ីស្រាអែល មួយចំនួននៅក្នុងតំបន់ហ្កាហ្សា រួមទាំងស្ត្រី និងកុមារប៉ាឡេស្ទីន ដែលត្រូវបានឃុំខ្លួននៅអ៊ីស្រាអែល។

មិនមានការអត្ថាធិប្បាយភ្លាមៗពីអ៊ីស្រាអែលទេ ដែលកាលពីថ្ងៃចន្ទបានប្រកាសថា សំណើបទឈប់បាញ់បីដំណាក់កាលដែលត្រូវបានអនុម័តដោយក្រុមហាម៉ាស គឺមិនអាចទទួលយកបានទេព្រោះលក្ខខណ្ឌត្រូវបានបន្ទាបខ្លាំងពេក៕