ប្រធានាធិបតីរបស់ប្រទេសម៉ិកស៊ិក បាននិយាយកាលពីថ្ងៃពុធ (០៨ ឧសភា) ថា ការដាច់ចរន្តអគ្គិសនីយ៉ាងទូលំទូលាយនៅក្នុងប្រទេស ត្រូវបានបង្កឡើងដោយអាកាសធាតុក្តៅខ្លាំងមិនសមហេតុផល ដោយធានាដល់អ្នកប្រើប្រាស់ថា បណ្តាញអគ្គិសនីជាតិនឹងមានសមត្ថភាពផលិតគ្រប់គ្រាន់សម្រាប់ផ្គត់ផ្គង់ដល់ប្រជាជនដែលរងផលប៉ះពាល់រាប់លាននាក់។

លោកប្រធានាធិបតី អាន់ដ្រេស ម៉ានូអែល ឡូប៉េស អូប្រាដ័រ (Andres Manuel Lopez Obrador) បានប្រាប់សន្និសីទព័ត៌មានរបស់រដ្ឋាភិបាលប្រចាំថ្ងៃថា រដ្ឋាភិបាលរបស់លោកក៏នឹងសម្របសម្រួលជាមួយក្រុមហ៊ុនផលិតថាមពលឯកជនផងដែរ ដែលទទួលខុសត្រូវលើការផលិតអគ្គិសនីប្រហែលពាក់កណ្តាលរបស់ប្រទេសម៉ិកស៊ិក។

យោងតាមទិន្នន័យពីប្រតិបត្តិករបណ្តាញអគ្គិសនី CENACE វិភាគដោយសារព័ត៌មានរ៉យទ័រ បានឱ្យដឹងថា រដ្ឋប្រហែល ២០ នៃរដ្ឋចំនួន ៣២ របស់ប្រទេសម៉ិកស៊ិក ត្រូវបានរងផលប៉ះពាល់ដោយការដាច់ចរន្តអគ្គិសនីកាលពីថ្ងៃអង្គារ។ លោក ឡូប៉េស អូប្រាដ័រ បាននិយាយថា «ការដាច់ចរន្តនេះគឺជាបញ្ហាដែលមិននឹកស្មានដល់» ដោយសាររលកកម្ដៅដែលកំពុងឆាបឆេះផ្នែកខ្លះនៃប្រទេស។

ការដាច់ភ្លើងនេះបានកើតឡើង ខណៈដែលផ្នែកធំៗនៃម៉ិកស៊ិកក៏កំពុងប្រឈមនឹងការខ្វះខាតទឹកយ៉ាងធ្ងន់ធ្ងរ រួមទាំងសង្កាត់ធំៗ ក្នុងរដ្ឋធានីម៉ិកស៊ិកូស៊ីធី ផងដែរ៕