មន្ត្រីអាមេរិកផ្នែកប្រព័ន្ធអ៊ីនធឺណិតជាន់ខ្ពស់មួយរូប បានឲ្យដឹងថា មន្ត្រីអាមេរិកបានប្រឈមមុខជាមួយរដ្ឋាភិបាលចិន នៅទីក្រុងប៉េកាំង កាលពីខែមេសា ពាក់ព័ន្ធនឹងយុទ្ធនាការចារកម្មតាមប្រព័ន្ធអ៊ីនធឺណិតដ៏ទូលំទូលាយមួយ ដែលតាមរយៈនោះពួកចោរព័ត៌មានចិន បានលួចចូលទៅក្នុងស្ថាប័នហេដ្ឋារចនាសម្ព័ន្ធសំខាន់ៗរបស់អាមេរិករាប់សិប។

មន្ត្រីអាមេរិកនិយាយថា ប្រទេសចិន ក្រោមយុទ្ធនាការដែលមានឈ្មោះថា Volt Typhoon មានគោលបំណងបង្កើនលទ្ធភាពចូលប្រើប្រាស់ដែលខ្លួនទទួលបាន នៅក្នុងស្ថាប័នរបស់សហរដ្ឋអាមេរិក ក្នុងករណីមានសង្គ្រាម ឬជម្លោះ ដែលនេះជាការឆ្លើយតបដល់ការកើនឡើងនូវភាពតានតឹង រវាងសហរដ្ឋអាមេរិក និងចិន ជុំវិញបញ្ហាកោះតៃវ៉ាន់។ កន្លងមកចិនបានច្រានចោលការចោទប្រកាន់បែបនេះថា គ្មានមូលដ្ឋាន។

ក្នុងបទសម្ភាសន៍មួយជាមួយសារព័ត៌មាន Reuters នៅឯសន្និសីទ RSA ក្នុងទីក្រុង San Francisco កាលពីថ្ងៃអង្គារ (ទី៧ ខែឧសភា) លោក Nathaniel Fick ឯកអគ្គរដ្ឋទូតសហរដ្ឋអាមេរិកទទួលបន្ទុកផ្នែកអ៊ីនធឺណិត និងគោលនយោបាយឌីជីថល បានប្រាប់ថា៖ «យើងបានសន្ទនាដោយផ្ទាល់ជាមួយចិនអំពីបញ្ហានេះ»។

លោក Fick បាននិយាយថា៖ «យើងបានលើកឡើងពីបញ្ហានេះដោយផ្ទាល់ជាមួយរដ្ឋាភិបាលចិន ក្នុងជំនួបកម្រិតជាន់ខ្ពស់ ហើយបានបញ្ជាក់យ៉ាងច្បាស់ថា ឥរិយាបថបែបនេះ គឺមានគ្រោះថ្នាក់ និងកាន់តែអាក្រក់ទៅៗ ហើយវាមិនអាចទទួលយកបានទេ»។ លោកបានបញ្ជាក់បន្ថែមថា លោកបាននិយាយទៅកាន់មន្ត្រីចិន រួមជាមួយរដ្ឋមន្ត្រីការបរទេសអាមេរិក លោក Antony Blinken ដែលស្ថិតនៅក្នុងប្រទេសចិន ពីថ្ងៃទី២៤ ដល់ថ្ងៃទី២៦ ខែមេសា។

នៅពេលសួរថា តើចិនឆ្លើយតបយ៉ាងដូចម្តេចនោះ លោក Fick បាននិយាយថា «តាមរបៀបដូចគ្នាដែលពួកគេបានទទួលស្គាល់ពីមុន។ ពួកគេបាននិយាយពីមុនថា វាជាការព្យាយាមដោយទីភ្នាក់ងារសហរដ្ឋអាមេរិកផ្សេងៗ ដើម្បីទទួលបានមូលនិធីកាន់តែច្រើន»។

ពាក់ព័ន្ធនឹងការលើកឡើងនេះ ស្ថានទូតចិនប្រចាំទីក្រុងវ៉ាស៊ីនតោនមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ កាលពីថ្ងៃពុធ (ទី៨ ខែឧសភា)៕