ប្រធានាធិបតីអ៊ុយក្រែន លោក វ្ល៉ូឌីមី ហ៊្សេឡិនស្គី (Volodymyr Zelenskiy) កាលពីថ្ងៃព្រហស្បតិ៍ (០៩ ឧសភា) បានបណ្តេញប្រធានកងឆ្មាំអង្គរក្សរបស់រដ្ឋចេញពីតំណែង រយៈពេលពីរថ្ងៃបន្ទាប់ពីសមាជិកពីររូបត្រូវបានចោទប្រកាន់ពីបទរៀបចំផែនការធ្វើឃាតប្រធានាធិបតី។ លោក ហ៊្សេឡិនស្គី បានចេញក្រឹត្យដកតំណែងលោក សើហ៊ី រូដ (Serhiy Rud) ហើយពុំមានអ្នកស្នងតំណែងត្រូវបានគេបើកបង្ហាញឡើយ ។

សេវាសន្តិសុខរដ្ឋរបស់អ៊ុយក្រែន (SBU) បាននិយាយនៅសប្តាហ៍នេះថា ខ្លួនបានចាប់បុរសពីរនាក់ ដែលជាវរសេនីយឯកនៅក្នុងទីភ្នាក់ងារកងអង្គរក្សរដ្ឋ ដោយចោទប្រកាន់ពីបទរៀបចំផែនការធ្វើឃាតលោក ហ៊្សេឡិនស្គី និងប្រមុខមន្ត្រីផ្សេងទៀត។

សេវាសន្តិសុខ SBU បាននិយាយថាការធ្វើឃាតនេះនឹងក្លាយជា «អំណោយ» សម្រាប់លោក វ្ល៉ាឌីមៀ ពូទីន ខណៈលោកបានស្បថចូលកាន់តំណែងសម្រាប់អាណត្តិថ្មីនៅក្នុងវិមានក្រឹមឡាំងកាលពីថ្ងៃអង្គារ។ បុរសដែលជាជនសង្ស័យទាំងនោះត្រូវបានជ្រើសរើសដោយសេវាសន្តិសុខសហព័ន្ធ (FSB) របស់រុស្ស៊ីដែលបានលេចធ្លាយព័ត៌មានសម្ងាត់ទៅឱ្យទីក្រុងមូស្គូ។

ទីភ្នាក់ងារសន្តិសុខជាតិ SBU នេះបានបន្ថែមថា ជនល្មើសទាំងនោះមានភារកិច្ចស្វែងរកអ្នកដែលជិតស្និទ្ធនឹងឆ្មាំអង្គរក្សរបស់ប្រធានាធិបតី រួចចាប់ខ្លួនលោក ហ៊្សេឡិនស្គី ធ្វើជាចំណាប់ខ្មាំង ហើយក្រោយមកនឹងសម្លាប់លោកចោល។ មិនមានការបញ្ជាក់លម្អិតទេជុំវិញថាពេលណាដែលគម្រោងធ្វើឃាតនោះ ត្រូវបានគេទម្លាយ៕